വിദ്യ

കടവും അപകടവും

2011-01-29T21:52:00.000-08:00

ഒരു സ്കൂള്‍ കുട്ടി ചോദിച്ചതാണ്‌ " ആളുകള്‍ കയ്യില്‍ കാശുള്ള‌പ്പോഴും ബിസിനസ്സ് നടത്താന്‍ കടമെടുക്കുന്നത് എന്തിനാണ്‌?"

ന്യായമായ ചോദ്യം. കയ്യില്‍ കാശുണ്ടെങ്കില്‍ പിന്നെ അതെടുത്ത് ബിസിനസ്സ് ചെയ്യരുമോ?

ഒരാള്‍ ഒരു ബിസിനസ്സ് തുടങ്ങുകയാണെന്നു വയ്ക്കാം. ചെറിയ ഒരു ഉപകരണം വില്‍ക്കാനാണ്‌ ഉദ്ദേശം. നല്ല ബിസിനസ്സ്. സാധനം ഒന്നിനു ഇരുന്നൂറ്റി ഇരുപത്തഞ്ച് രൂപയ്ക്ക് വാങ്ങി മുന്നൂറ്റി അമ്പതു രൂപയ്ക്ക് വില്‍ക്കാം. ഒരെണ്ണം വില്‍ക്കുമ്പോള്‍ നൂറ്റി ഇരുപത്തഞ്ചു രൂപ ലാഭം. ഒരു കൊല്ലം അയ്യായിരം എണ്ണം ന്യായമായും വിറ്റു പോകേണ്ടതാണ്‌. പതിനഞ്ചു ലക്ഷം മുതല്‍ മുടക്കുണ്ട്.

ഇദ്ദേഹത്തിന്റെ ഒരാണ്ട് വരവു ചിലവ് നോക്കാം നമുക്ക്:

പതിനഞ്ചു ലക്ഷം രൂപ മുടക്കിയാല്‍ ഇദ്ദേഹത്തിനു മുടക്കിനു പതിനെട്ടു ശതമാനം ലാഭം കിട്ടും. നല്ലത്, പക്ഷേ ഇതേ ബിസിനസ്സ് ഇങ്ങനെ തന്നെ നടത്തി കൂടുതല്‍ ലാഭം ഉണ്ടാക്കാന്‍ എന്തു വഴി?

ഈ വ്യക്തി പത്തു ലക്ഷം രൂപ ബാങ്കില്‍ നിന്നും പത്തു ശതമാനം പലിശയ്ക്ക് എടുക്കാന്‍ പദ്ധതി ഇടുന്നെന്ന് വയ്ക്കുക. ഒരാണ്ട് വരവു ചിലവ് ഇങ്ങനെ.

പദ്ധതി രണ്ട് പ്രകാരം ഇയാള്‍ ഇതേ ബിസിനസ്സ് അഞ്ചു ലക്ഷം രൂപ മാത്രം മുടക്കി മുടക്കു മുതലിനു മുപ്പത്തഞ്ച് ശതമാനം ലാഭം ഉണ്ടാക്കുന്നു!

ഇതെന്താണിങ്ങനെ? ഇയാളുടെ ബിസിനസ്സിനു പതിനെട്ടു ശതമാനം ലാഭമുണ്ട്. ബാങ്ക് ലോണിനു ചിലവ് പത്തു ശതമാനം പലിശയാണ്‌.

അതായത് ബാങ്ക് ലോണിനെക്കാള്‍ കൂടിയ ലാഭമുള്ള ബിസിനസ്സ് ആണെങ്കില്‍ ലോണ്‍ നല്ലതാണെന്ന് വരുന്നു. എങ്കില്‍ പിന്നെ പണം മുടക്കുന്നതെന്തിന്‌, ലോണല്ലേ എപ്പോഴും നല്ലത് എന്ന് തോന്നുന്നോ? വരട്ടെ, എല്ലാ ബിസിനസ്സിനും റിസ്ക് ഉണ്ട്. അയ്യായിരം യൂണിറ്റ് വില്‍ക്കാമെന്നു കരുതി ഇദ്ദേഹം കട തുറന്നപ്പോള്‍ അടുത്ത് വേറൊരുത്തന്‍ ഇതേല്‍ സ്വല്പ്പം ലോ ക്വാളിറ്റി ആണെങ്കിലും വില കുറവുള്ള ചൈനീസ് ഉപകരണം വില്‍ക്കാന്‍ തുടങ്ങി. വിചാരിച്ചതുപോലെ അയ്യായിരം വില്‍ക്കാന്‍ അതുകാരണം കഴിഞ്ഞില്ല, മൂവായിരത്തി ഒരുനൂറ് എണ്ണമേ വിറ്റുള്ളൂ. നമുക്ക് രണ്ട് പദ്ധതിയും ഒന്നുകൂടെ നോക്കാം.

കടമില്ലെങ്കില്‍ ബിസിനസ്സ് ഒരു തരത്തില്‍ ഓടിപ്പോകുന്നുണ്ട്, പക്ഷേ കടമെടുത്താല്‍ സംഗതി നഷ്ടമാകും.

കടത്തിന്റെ കളി കൊണ്ട് ലാഭം കൂട്ടുന്ന ഇടപാടിനു ഫൈനാല്‍ഷ്യല്‍ ലീവറേജ് എന്നാണു പറയുക. ലാഭത്തില്‍ നിന്നും അടയ്ക്കേണ്ട പലിശ നിശ്ചിതമാണ്‌, നിങ്ങള്‍ എന്തു ചെയ്താലും ബാങ്കിനു തിരിച്ചടവും വേണം പലിശയും വേണം. ലീവറേജ് കൂടുന്തോറും റിസ്കും കൂടി വരും. ലീവറേജ് എത്ര വേണം എന്നു നിശ്ചയിക്കുന്നതിലെ ഒരു പ്രധാന മാനദണ്ഡം നിങ്ങളുടെ ഓപ്പറേഷന്‍ എത്ര കണ്ട് അത് താങ്ങും എന്നതാണ്‌.

ഫൈനാന്‍ഷ്യല്‍ ലീവറേജ് എന്താണെന്നു മനസ്സിലാക്കാന്‍ വേണ്ടിയുള്ള ഒരു ലളിത ഉദാഹരണം മാത്രമാണ്‌. ശരിക്കുള്ള ബിസിനസ്സില്‍, പ്രത്യേകിച്ച് വന്‍ കമ്പനികള്‍ എത്ര മുടക്കണം എത്ര കടമെടുക്കണം എന്നു നിശ്ചയിക്കുന്നത് വളരെ സങ്കീര്‍ണ്ണമായ പ്രക്രിയ ആണ്‌. അതിനു സ്പെഷ്യലിസ്റ്റുകള്‍ തന്നെയുണ്ട്.

ഇനി-എന്തുകൊണ്ട് ബ്ലേഡില്‍ നിന്നു കടമെടുക്കുന്ന ബിസിനസ്സുകള്‍ പൊളിയാന്‍ സാദ്ധ്യത വളരെക്കൂടുന്നു? ഇവര്‍ മുപ്പതു മുതല്‍ നാല്പ്പത് ശതമാനം വരെ ഒക്കെ പലിശ വാങ്ങുന്നു. ഇത്രയും ലാഭം-മുടക്ക് ശതമാനമുള്ള ബിസിനസ്സുകള്‍ തീരെ കുറവാണെന്നു മാത്രമല്ല, ഇത്രയും പലിശയുള്ള കടം കൊണ്ട് എന്തു ചെയ്താലും അതിലെ ഫൈനാന്‍ഷ്യല്‍ റിസ്ക് മൂലം ബിസിനസ്സില്‍ വരുന്ന ചെറിയ വ്യതിയാനങ്ങള്‍ പോലും പ്രതീക്ഷിക്കാത്ത വിധം മാരകമായിരിക്കും.

ഒട്ടും കടമെടുക്കാത്തവര്‍ അവസരം നഷ്ടപ്പെടുത്തും പക്ഷേ വകതിരിവില്ലാത്തെ കടമെടുക്കുന്നവര്‍ ബിസിനസ്സ് തന്നെ നഷ്ടപ്പെടുത്തും എന്നു ചുരുക്കം

എന്റെ ഡിപീഈപി പ്രോജക്റ്റ് - 11

2009-04-16T12:17:00.001-07:00

ചണ്ണ / കാട്ടുകൂവ
ശാസ്ത്രനാമം curcuma zingiberaceae
കണ്ടെത്തിയത് പരുന്തു പാറ , ഇടുക്കി

മഞ്ഞളിന്റെ പോല്യുള്ള ചെടിയും വര്‍‌ണ്ണവൈവിദ്ധ്യമുള്ള പൂക്കുറ്റിയും കണ്ടാല്‍ തിരിച്ചറിയാം

എന്റെ ഡിപീഈപി പ്രോജക്റ്റ് - 10

2009-04-16T12:08:00.001-07:00

പൂവാങ്കുറുന്തല്‍ / പൂവാങ്കുരുന്ന്
ശാസ്ത്രനാമം veronina cineria
കണ്ടെത്തിയത് കുണ്ടറയിലെ വീട്ടുപറമ്പില്‍
മൊട്ടു പോലെയുള്ള ഇളം പിങ്ക് പൂക്കളുടെ ശേഖരമാണ്‌ ഈ ചെടിയാകെ. എപ്പോഴും പൂക്കളുള്ള ചെയ്യുമെന്നതിനാല്‍ ഇതിനെ വേഗം തിരിച്ചറിയാം.

എന്റെ ഡിപീഈപി പ്രോജക്റ്റ് - 9

2009-04-16T12:04:00.000-07:00

കുന്നിക്കുരു
ചെടിയുടെ ശാസ്ത്രനാമം : abrus precatorius
ചുവപ്പില്‍ കറുത്ത പൊട്ടുള്ള പയര്‍മണികളില്‍ നിന്നും തിരിച്ചറിയാം ഉപരിചിതമായ ഈ വള്ളിയെ.

എന്റെ ഡിപീഈപി പ്രോജക്റ്റ് - 8

2009-04-16T11:53:00.001-07:00

ഇതെന്തെന്ന് എനിക്കു കണ്ടെത്താനായിട്ടില്ല. കുണ്ടറയിലെ വീട്ടുപറമ്പില്‍ വിരിഞ്ഞത്. heliotropium indicum നോട് വളരെ സാമ്യമുള്ള പൂക്കള്‍, എന്നാല്‍ നീളമുള്ള പൂങ്കുല കാണാനുമില്ല.

എന്റെ ഡിപീഈപി പ്രോജക്റ്റ് - 7

2009-04-16T11:49:00.001-07:00

നിലപ്പന
curculigo orchioides
കണ്ടെത്തിയ സ്ഥലം : വീട്ടുപറമ്പ്, കുണ്ടറ
ദശപുഷ്പങ്ങളില്‍ ഒന്നായതിനാല്‍ നിഷ്പ്രയാസം തിരിച്ചറിയാം. നിലത്തു നിന്നുള്ള ഓലകളും നിലം തൊട്ടു വിരിയുന്ന ചെറു മഞ്ഞ പ്പൂക്കളും ലക്ഷണം

എന്റെ ഡിപീഈപി പ്രോജക്റ്റ് - 6

2009-04-16T11:40:00.000-07:00

കായാമ്പൂവിന്റെ മൊട്ട്
ശാസ്ത്രനാമം : memecylon edule

സ്ഥലം : വീട്ടുപറമ്പ്, കുണ്ടറ

വിചിത്രമായ ഡിസൈനുള്ള മൊട്ടും ചെടിയുടെ ഇലയും വള്ളിയും കണ്ടാല് തിരിച്ചറിയാം. മനോഹരമായ നീലയുടെ ഒരു ഷേഡാണ് ഈ മൊട്ടുകള് വിരിയുന്ന പൂക്കള്‍ക്ക്.

വിടര്‍ന്നതും മൊട്ടും ചേര്‍ന്ന കായാമ്പൂക്കുലകളുടെ ഒരു ചിത്രം ശ്രീമതി റിയ ടാന്‍ ചെക്ക് ജാവയില്‍ വച്ച് എടുത്തത് ഇവിടെ കാണാം ( ആ പോസ്റ്റ് പൂക്കളെക്കുറിച്ചല്ല)

എന്റെ ഡിപീഈപി പ്രോജക്റ്റ് - 5

2009-04-16T11:33:00.000-07:00

അമ്മൂമ്മപ്പഴം
ശാസ്ത്രനാമം : passiflora foetida

കണ്ടെത്തിയ സ്ഥലം - വീട്ടുപറമ്പ്, കുണ്ടറ
പാഷന്‍ ഫ്രൂട്ടിന്റേതു പോലെയുള്ള എന്നാല്‍ ആകൃതിയില്‍ ചെറിയ പൂക്കള്‍, പച്ചവല മൂടിയ പാഷന്‍ ഫ്രൂട്ട് രുചിയുള്ള പഴം എന്നിവകൊണ്ട് തിരിച്ചറിയാം. ഈ ചെടിയുടെ സ്പ്രിങ്ങ് വലകള്‍ ചെറു പ്രാണികളെ കുരുക്കി കൊല്ലാറുണ്ടന്നും എന്നാല്‍ ഇത് മാംസഭോജിയാണോ അല്ലയോ എന്ന് ആര്‍ക്കും ഉറപ്പില്ലെന്നും കേള്‍ക്കുന്നു. അതിനെക്കുറിച്ച് കൂടുതല്‍ അറിയില്ല.

എന്റെ ഡിപീഈപി പ്രോജക്റ്റ് - 4

2009-04-16T11:26:00.000-07:00

കലമ്പി പൂവ് (പലതരം മോണിങ്ങ് ഗ്ലോറിപ്പൂക്കളില് ഒന്ന്)
ശാസ്ത്രനാമം : ipomoea indica
കണ്ടെത്തിയ സ്ഥലം: വഴിയോരം, കോട്ടയം.
പൂവിന്റെ ആകൃതിയും നിറവും രാവിലേയുള്ള വിടരലും കൊണ്ട് തിരിച്ചറിയാം.

എന്റെ ഡിപീഈപി പ്രോജക്റ്റ് - 3

2009-04-16T02:08:00.001-07:00

ചെടി എന്തെന്ന് മനസ്സിലായില്ല. വളരെ ചെറിയ വെള്ളപ്പൂക്കളുള്ള വയല്ച്ചുള്ളിയെപ്പോലെ തണ്ടുകളുള്ള ചെറു സസ്യം. കണ്ടെത്തിയത് കുണ്ടറയിലെ ഒരു വയലില്. കുഞ്ഞിപ്പൂക്കള് ആയിരക്കണക്കിനുള്ള ഒരു പടര്പ്പായാണ് ഇതിനെ കണ്ടത്

എന്റെ ഡിപീഈപി പ്രോജക്റ്റ് - 2

2009-04-16T01:00:00.000-07:00

കിഴിക്കുത്തു മുല്ല/ കുലമറിച്ചി/ റങ്കൂണ്‍ വള്ളി.
ശാസ്തനാമം : quisqualis indica

കണ്ടെത്തിയത്, വീട്ടുപറമ്പ്- കുണ്ടറ
സന്ധ്യക്കു വിരിയുമ്പോള്‍ വെള്ളനിറവും അടുത്ത പ്രഭാതത്തില്‍ പിങ്കും വീണ്ടും സായാഹ്നമാകുമ്പോള്‍ ചുവപ്പും നിറമാകുന്ന മണമുള്ള പൂക്കള്‍ വിരയിക്കുന്ന ഈ ബര്‍മ്മക്കാരി അലങ്കാരച്ചെടിയായി ഇന്ത്യയിലെത്തുകയും ശേഷം വെളിപ്രദേശങ്ങള്‍ കയ്യേറുകയും ചെയ്തതാണ്‌.

എന്റെ ഡിപീഈപി പ്രോജക്റ്റ് - 1

2009-04-14T01:30:00.000-07:00

പഠിച്ചത് സര്‍ക്കാര്‍ പള്ളിക്കൂടത്തിലാണെങ്കിലും ഡി പി ഈ പി പദ്ധതി നിലവില്‍ വരുന്നതിനും വളരെ മുന്നേ സ്കൂളിങ്ങ് കഴിഞ്ഞു പോയി. ഇതൊരു വയോജന പ്രോജക്റ്റ്. കുണ്ടറയിലെ എന്റെ വീട്ടിലും പരിസരത്തും മറ്റാവശ്യങ്ങള്‍ക്കായി പോയ വഴിയിലും കണ്ട നാടന്‍ പൂക്കളെ തിരിച്ചറിയാനുള്ള ശ്രമങ്ങള്‍. മൊത്തമായി വിജയിച്ചിട്ടില്ല. അറിയാത്ത പൂക്കളെയും ഞാന്‍ മനസ്സിലാക്കിയതിലെ തെറ്റുകളെയും ആരെങ്കിലും പറഞ്ഞു തരുമെന്ന് പ്രതീക്ഷ.

പൂച്ചെടിയുടെ പേര്‍ : ശീമക്കൊങ്ങിണി
ശാസ്ത്രനാമം : stachytarpheta indica
കണ്ടെത്തിയ ഇടം : പാഞ്ചാലിമേട്, ഇടുക്കി.
സാധാരണ നാട്ടിന്‍പുറങ്ങളിലെല്ലാം കണ്ടുവരാറുള്ള ചെടി. അരയടി നീളമുള്ള പൂങ്കുലയില്‍ നിലകളായി വിരിയുന്ന രണ്ടുമൂന്നു നീല/വയലറ്റ് പുഷ്പങ്ങള്‍ കൊണ്ട് തിരിച്ചറിഞ്ഞു.

ഇലുമ്പിക്കായ

2008-07-14T22:48:00.000-07:00

ഇത് സാദാ ഇലുമ്പി (averrhoa bilimbi ). കാര്യവിവരങ്ങള്‍ അറിയാന്‍ മോളമ്മയുടെ പാവങ്ങളുടെ മുന്തിരി (Averrhoa bilimbi) എന്ന പോസ്റ്റ് നോക്കുക. ഇലുമ്പി, ഇലുമ്പന്‍ പുളി, പുളിഞ്ച്ചിക്കായ എന്നൊക്കെ പല പേരുണ്ട്

കേരളത്തില്‍ കൂടുതലും മേലേ കാണുന്ന ഇലുമ്പി ആണെങ്കിലും ഏതാണ്ട് ഇതേ മണഗുണങ്ങളുള്ള വലിപ്പം കൂടിയ മറ്റൊരിനവുമുണ്ട്, ആനയിലുമ്പി.

പുറം നാടുകളില്‍ സ്റ്റാര്‍ ഫ്രൂട്ട് എന്നു പേര്‍ വിളിക്കും ഇതിനെ. കുറുകേ ഛേദിച്ചാല്‍ നക്ഷത്രത്തിന്റെ (ശരിക്കുള്ളതല്ല, ക്രിസ്റ്റുമസ് നക്ഷത്രം കെട്ടില്ലേ, അതിന്റെ ) ആകൃതിയാണിതിന്‌. ശാസ്ത്രനാമം averrhoa carambola

ഉപയോഗം
ഇലുമ്പിക്കായകള്‍ അച്ചാറിടാം, മീന്‍‌കറിക്ക് പുളിയായി ചേര്‍ക്കാം, ചുമ്മാ ഉപ്പു ചേര്‍ത്ത് തിന്ന് വ്യാക്കൂണ്‍ അടക്കാം, മറ്റു സിട്രസ് പഴങ്ങളെപ്പോലെ വൈറ്റമിന്‍ സി സമൃദ്ധമാണ്‌. പുളിപ്പിച്ചാല്‍ അസ്സല്‍ വൈനും വാറ്റിയാല്‍ സൂപ്പര്‍ പട്ടയും കിട്ടും. (വൈന്‍ ഉണ്ടാക്കിയിട്ടുണ്ട്, വാറ്റ് പരീക്ഷിച്ചിട്ടില്ല)

ആരോഗ്യസംബന്ധം:
(മുന്നറിയിപ്പ്: ഞാന്‍ ഡോക്റ്ററല്ല, ഇത് വൈദ്യോപദേശവുമല്ല.)
ഇലുമ്പിക്കായയില്‍ വളരെ ഉയര്‍ന്ന തോതില്‍ ഓക്സാലിക്ക് ആസിഡ് അടങ്ങിയിരിക്കുന്നു. പല ലോഹ അയോണുകളുമായി ചേര്‍ന്ന് ഇവ ഓക്സലേറ്റുകള്‍ ആകാന്‍ കഴിവുണ്ട് എന്നതിനാല്‍ വൃക്ക- അനുബന്ധ രോഗങ്ങളുള്ളവര്‍ ഇലുമ്പിക്കായ കഴിക്കുന്നത് നന്നല്ല. ആനയിലുമ്പി സ്ഥിരം സലാഡില്‍ പ്രത്യക്ഷപ്പെടാറുള്ള ഹവായി ദ്വീപുകളില്‍ വൃക്കരോഗമുണ്ടെന്ന് അറിയാതെ ഇത് കഴിച്ച് ക്ഷണം ആളുകള്‍ മരിച്ചു പോയ സംഭവങ്ങളുണ്ടായിട്ടുണ്ട്.

"ഓക്സാലിക്ക് ആസിഡ് പോയിസണിങ്ങ്" എന്നൊക്കെ പറഞ്ഞുകളയുമെങ്കിലും ആരോഗ്യമുള്ള ഒരു കിഡ്ണി എങ്കിലും ഉള്ള മനുഷ്യരില്‍ ഇത് അപായമുണ്ടാക്കാന്‍ സാദ്ധ്യതയില്ലെന്നും ഇലുമ്പി പോലെയുള്ള ഭക്ഷണങ്ങള്‍ രോഗമില്ലാത്ത വൃക്കകളില്‍ ഓക്സലേറ്റ് അടിഞ്ഞു കൂടാന്‍ കാരണമാവില്ലെന്നുമാണ്‌ പൊതുവില്‍ വൈദ്യാഭിപ്രായം .

കൃത്യമായി തെളിയിക്കപ്പെട്ടിട്ടില്ലാത്ത മറ്റൊരു വാദം ഇലുമ്പികളില്‍ ഒരു ന്യൂറോടോക്സിന്‍ അടങ്ങിയിട്ടുണ്ടെന്നും ആരോഗ്യമുള്ള വൃക്കകള്‍ ഇതിനെ അടിച്ചു ദൂരെക്കളയുമ്പോള്‍ അവശവൃക്കകള്‍ ഇതിന്‌ അടിമപ്പെടുന്നെന്നും ഈ വസ്തുവും ഓക്സാലിക്ക് ആസിഡും കൂടിയുള്ള ഇരട്ടവെടിയാണ്‌ ഇലുമ്പിക്കായ കഴിക്കുമ്പോള്‍ മാത്രം ക്ഷണമരണമുണ്ടാകുന്നതെന്നും ഉയര്‍ന്ന തോതില്‍ ഓക്സാലിക്ക് ആസിഡുള്ള ചീര കഴിച്ച് ഇന്നുവരെ രോഗം മൂര്‍ച്ഛിച്ചേക്കുമെന്നല്ലാതെ ഒറ്റ ഡോസില്‍ മരണം ആര്‍ക്കും സംഭവിക്കാത്തതെന്നുമാണ്‌ .

ഇതിലും വലിയ പ്രശ്നം ഇലുമ്പിക്കായ ഗ്രേപ്പ് ഫ്രൂട്ടിനെപ്പോലെ ശക്തമായ എന്‍സൈം ഇന്‍‌ഹിബിറ്റര്‍ ആണെന്നതാണ്‌. കൊളസ്റ്റ്റോള്‍ മരുന്നുകള്‍(സ്റ്റാറ്റിനുകള്‍) , ചില മനോരോഗങ്ങള്‍ക്കുള്ള മരുന്നുകള്‍ തുടങ്ങി ചിലതിന്റെ ഡ്രഗ് മെറ്റബോളിസത്തെ തകിടം മറിച്ച് ഹൃദയസ്തംഭനത്തിനും കാരണമായേക്കാം.

അപായ ലക്ഷണം:
ആരെങ്കിലും ഇലുമ്പിക്കായ കഴിച്ച് പെട്ടെന്ന് എക്കിള്‍ ശര്‍ദ്ദി തകലറങ്ങി വീഴല്‍ തളര്‍ന്നു പോകല്‍, നെഞ്ചുവേദന, ബോധക്കേട്, ശ്വാസതടസ്സം എന്നീ ലക്ഷണം കാണിച്ചാല്‍ ഉടനടി ആശുപത്രിയിലെത്തിക്കുക, ജീവന്‍ രക്ഷാനടപടികള്‍ എത്രയും പെട്ടെന്ന് ചെയ്യാനാവേണ്ടതാണ്‌.

ചുരുക്കം:
1.ഇലുമ്പിക്കായ കഴിക്കാമോ?
തീര്‍ച്ചയായും.

2.എത്ര കഴിക്കാം?
കുറേ കഴിച്ചാല്‍ അസിഡിറ്റി ആകും ചിലര്‍ക്ക്, വേറേ എന്താ.

3.എല്ലാവര്‍ക്കും കഴിക്കാമോ?
പാടില്ല. വൃക്ക രോഗമുള്ളവര്‍, എന്തെങ്കിലും മരുന്നുകള്‍ കഴിച്ചുകൊണ്ടിരിക്കുന്നവര്‍ എന്നീ ആളുകള്‍ ഇലുമ്പിക്കായ ഉപയോഗിക്കാനേ പാടില്ല, ആപത്തായേക്കാം.

4. അല്ല, ഇനി ഞാന്‍ അറിയാതെ എനിക്കു വല്ല വൃക്കരോഗവുമുണ്ടെങ്കിലോ, കഴിക്കാത്തതല്ലേ നല്ലത്?

അങ്ങനെ ഭയക്കാന്‍ തുടങ്ങിയാല്‍ ശ്വാസം വലിക്കാന്‍ പോലും ഭയക്കേണ്ടിവരില്ലേ? എന്റെ ഒരു വീക്ഷണം അങ്ങനെ ആണ്‌.

കൊടങ്ങല്‍

2008-07-14T00:30:00.000-07:00

പെനിവോര്‍ട്ട് കുടുംബത്തില്‍ വരുന്ന ചെടിയാണ്‌ കൊടങ്ങല്‍ അധവാ മണ്ഡൂകപര്‍ണ്ണി.
സര്വ്വസാധാരണമായി നാട്ടിന്‍പുറത്തെല്ലാം ഇവ പൊടിച്ചു വളരുന്നത് കാണാം.

വടക്കോട്ട് ചിലയിടങ്ങളില്‍ ഇതിനെ ബ്രഹ്മി എന്നു വിളിക്കുമെങ്കിലും ശരിയായ ബ്രഹ്മി (bacopa monnieri) ഇതല്ല. ആയുര്വ്വേദത്തിലും ചൈനീസ് മരുന്നിലും ചേരുവയായ കൊടങ്ങല്‍ രക്താതിസമ്മര്‍ദ്ദത്തിനും നാഡീവ്യൂഹശക്തിക്കും മുറിവുണക്കുന്നതിനും നല്ലതെന്ന് വിശ്വസിക്കപ്പെടുന്നു. ഇതിന്റെ ഔഷധശക്തിയെക്കുറിച്ച് നടന്ന ശാസ്ത്രീയ പഠനങ്ങളും (http://www.ncbi.nlm.nih.gov/pubmed/11666128 ഉദാ.) ആശാവഹമായ തെളിവുകളാണ്‌ തരുന്നത്.

കൊടങ്ങല്‍ ശ്രീലങ്കന്‍, തായ് വിഭവങ്ങളിലെ ചേരുവയാകാറുണ്ട്. ഇതിന്റെ നീരുകുടിക്കുകയും സലാഡില്‍ ചേര്‍ക്കുകയും പല നാടുകളിലും ചെയ്യുന്നുണ്ട്.

ഇത്രയും പുസ്തകത്തില്‍ നിന്നുള്ളത്. നാട്ടില്‍ പൊതുവേ ഭക്ഷണത്തില്‍ കൊടങ്ങല്‍ ഉപയോഗിച്ച് കണ്ടിട്ടില്ല. (സൂപ്പര്‍ മാര്‍ക്കറ്റില്‍ വാങ്ങാന്‍ കിട്ടാത്തതുകൊണ്ടാണോ ആവോ) നിറയേ ഫൈബറും പോഷണവും നിറഞ്ഞ കൊടങ്ങലിന്റെ ഇല ചീര പോലെ തോരന്‍ വച്ചോ ചമ്മന്തിയില്‍ അരച്ചു ചേര്‍ത്തോ കഴിക്കാം. മലവേഗം മെച്ചപ്പെടും, അതായത് ഇറിറ്റബിള്‍ ബവ്വല്‍ സിന്‍ഡ്റോം, മലബന്ധം, കുടല്പ്പുണ്ണ്, അസിഡിറ്റി, കോളൈറ്റിസ്/ക്രോണ്‍സ് തുടങ്ങി അര്‍ശ്ശസിനു വരെ നല്ല കുറവുണ്ടാകും (പരിചയമുള്ള പത്തിരുപതു പേരെ വച്ച് നടത്തിയ പ്ലാസിബോരഹിത പരീക്ഷണത്തിന്റെ ഫലം!) . രക്തസമ്മര്‍ദ്ദം മെച്ചപ്പെട്ടു എന്നും അവകാശപ്പെടുന്ന ആളുണ്ടെങ്കിലും ഒരു കാരണ-കാര്യ ബന്ധം ഉറപ്പിക്കാനായില്ല.

ഭക്ഷണത്തിലെ വൈവിദ്ധ്യമില്ലായ്മയും ജീവിതശൈലീരോഗങ്ങളും തമ്മിലുള്ള ബന്ധം വലുതാണ്‌, വല്ലപ്പോഴും ഇത്തിരി കൊടങ്ങല്‍ തോരന്‍ പരീക്ഷിക്കൂ, ഒരു മാറ്റമായിക്കോട്ടെ.

നിശാഗന്ധി

2008-06-28T23:10:00.000-07:00

കള്ളിച്ചെടികളെ പൂന്തോട്ടത്തില്‍ വളര്‍ത്തുന്ന പതിവ്‌ പണ്ടൊന്നും നമുക്കില്ലായിരുന്നു. കള്ളിയുടെ സ്ഥാനം വേലിക്കലാണ്‌, ആടും പശുവും മനുഷ്യനും വേലികടന്നു വരാതെ നോക്കുന്ന മുള്‍ച്ചെടികള്‍, അത്രതന്നെ.

ഒരേയൊരപവാദമാണ്‌ നിശാഗന്ധി. മുള്ളു കൂര്‍പ്പിച്ച തടിയന്‍ തണ്ടുമൊന്നുമില്ലാത്ത ഈ മെലിഞ്ഞ കള്ളി വീട്ടുമുറ്റത്തൊരു മരത്തില്‍ പടര്‍ന്നു കയറി സൌരഭ്യമുള്ള നിശാപുഷ്പങ്ങള്‍ സമ്മാനിക്കുന്ന പ്രത്യേകിച്ച്‌ ഒരു പരിചരണവും ആവശ്യമില്ലാത്ത ചെടിയായതിനാലാവും അത്‌.തണ്ട് മുറിച്ച് നട്ടാല്‍ നിശാഗന്ധിയെ പ്രജനനം ചെയ്യിക്കാം.

നിശാഗന്ധി [ദ്വിധനാമം epiphyllum oxypetalum ] നൈറ്റ്‌ ബ്ലൂമിങ്ങ്‌ സിറിയസ്‌, ഓര്‍ക്കിഡ്‌ കാക്റ്റസ്‌, ക്വീന്‍ ഓഫ്‌ നൈറ്റ്‌ എന്നൊക്കെ പലപേരുകളില്‍ അറിയപ്പെടുന്നെങ്കിലും ഏറ്റവും പ്രചാരത്തിലുള്ള ഇംഗ്ലീഷ്‌ പേര്‍ ഡച്ച്‌മാന്‍'സ്‌ പൈപ്പ്‌ എന്നാണ്‌. കാലിക്കോ പോലെ മറ്റു ചില പൂച്ചെടികളെയും ഡച്ച്‌മാന്‍'സ്‌ പൈപ്പ്‌ എന്നു ചിലര്‍ വിളിക്കുന്നതിനാല്‍ തെറ്റിദ്ധാരണയുണ്ടായേക്കാം,ശാസ്ത്രീയനാമം തന്നെ ശരണം.

epiphyllum എന്നാല്‍ phyllusസിന്റെ, അതായത്‌ ഇലകള്‍ക്കൂ മേല്‍ വളരുന്നത്‌ എന്നാണര്‍ത്ഥം, phylum - എന്ന വാക്കുമായി ഇതിനു ബന്ധമില്ല. oxy-petalum എന്നാല്‍ മുനമ്പിച്ച പൂവിതളുകള്‍ എന്നും.

പ്രഭാതം- നിലത്തേക്ക് കുനിഞ്ഞ് കിളിര്‍ത്ത മൊട്ട്

ഒറ്റനോട്ടത്തില്‍ പൂക്കള്‍ വിരിയുന്നത്‌ ഇലകളില്‍ നിന്നാണെന്ന് തോന്നും, എന്നാല്‍ നിശാഗന്ധിയുടെ ഇലകള്‍ പോലെ തോന്നുന്ന ഭാഗം ഇലയായും വര്‍ത്തിക്കുന്ന തണ്ടുകള്‍ (phylloclade) ആണ്‌.

സായാഹ്നം - വിടരാന്‍ തയ്യാറെടുത്ത് മുകളിലേക്ക് തലയുയര്‍ത്തിയ മൊട്ടുകള്‍

രാത്രി- രജനീഗന്ധി വിടരുന്നു

ഡച്ച് മാന്‍സ് പൈപ്പ് പോലെ തന്നെ തോന്നുന്നില്ലേ? വശത്തുനിന്നുള്ള വീക്ഷണം

ദാ പൂക്കള്‍, വലിപ്പമുള്ള വെണ്ണനിറത്തിനും വെള്ള നിറത്തിനും ഇടയിലെവിടെയോ ഉള്ള ആ നിറം അപ്പടി പകര്‍ത്താന്‍ എന്റെ കഴിഞ്ഞോ ആവോ.

രാത്രിയല്ലേ, ഇരുട്ടല്ലേ. മണത്തില്‍ മോഹിതനായി വരുന്ന പോളിനേറ്റിങ്ങ് ഏജന്റ് കണ്ണു പിടിക്കാതെ പോയാലോ, തീപ്പെട്ടിക്കൊള്ളി പോലെ വലിയ ഒരടുക്ക് സ്റ്റേമനും നീരാളിയുടെ ആകൃതിയില്‍ ഗൈഡ് വയറിങ്ങ് നടത്തിയ സെവന്റി എം എം കാര്പെലും ഉണ്ടാക്കി നിര്‍ത്തുക തന്നെ പോം വഴി. ഇനി ഉന്നം തെറ്റി പോകരുതല്ലോ.

വീണ്ടും പ്രഭാതം. ദേ പെര്‍ഫ്യൂം ഫാക്റ്ററി കം ഔട്ട്ലെറ്റ് അടച്ചു. വാടിയ പൂവ്.

[എന്തെങ്കിലും പോസ്റ്റു വന്നിട്ടു വര്‍ഷമൊന്നു കഴിഞ്ഞ, ഗൂഗിള്‍ പോലും സ്പാമെന്നു വിളിച്ച് തള്ളിയ ഈ ബ്ലോഗിലെ അഗ്രിഗേറ്ററുകള്‍ ലിസ്റ്റ് ചെയ്യാത്ത കഴിഞ്ഞ പോസ്റ്റ് ഇട്ട ദിവസം തന്നെ തപ്പിക്കണ്ടെത്തി കമന്റിയ ജയരാജനു ഈ നിശാഗന്ധി സമര്‍പ്പിക്കുന്നു ]

തൊണ്ടിപ്പഴം

2008-06-14T01:56:00.000-07:00

"ചൊടികള്‍ തൊണ്ടിപ്പഴം പോലെ" എന്നു കേട്ടിട്ടില്ലാത്തവര്‍ വിരളമായിരിക്കും. തൊണ്ടിപ്പഴം കണ്ടിട്ടില്ലാത്തവര്‍ക്കും ശ്രദ്ധിച്ചിട്ടില്ലാത്തവര്‍ക്കുമായാണ്‌ ഈ പോസ്റ്റ്.

തൊണ്ടി (Sterculia foetida) Malvaceae കുടുംബത്തിലെ ഒരു വൃക്ഷമാണ്‌. നാല്പ്പതു മീറ്ററോളം ഉയരത്തില്‍ വളരുന്ന ഈ കൂറ്റന്‍ മരം തെക്കേ ഏഷ്യ, ആഫ്രിക്ക, ആസ്ത്രേലിയ എന്നീ ഭൂഭാഗങ്ങളിലുണ്ട്. ഇന്ത്യയില്‍ വേനലില്‍ പൂക്കുകയും മഴക്കാലത്തിനു തൊട്ടുമുന്നേ കായ്കളാവുകയുമാണ്‌ പതിവ്. താഴത്തെ ചിത്രത്തിലെ തൊണ്ടി വളര്‍ച്ചയെത്തിയിട്ടില്ലെങ്കിലും കായ്ച്ചു തുടങ്ങി.

പഴത്തിന്റെ തൊണ്ടിന്റെ മനോഹരമായ നിറമാണ് “തൊണ്ടി” എന്ന പേര്‍ ഇതിനു നല്‍കാന്‍ കാരണമായത്. അകത്ത് കറുത്ത നിറത്തിലെ വലിയ കുരുക്കള്‍ ഉണ്ടാകുന്നത് തൊണ്ടി പാകമാകുന്നതോടെ പൊട്ടിത്തുറന്ന് വീഴുന്നു. പാകം കഴിഞ്ഞ് പൊട്ടിത്തുറന്ന കായകളാണ് ചിത്രത്തില്‍.

മേഘദൂതത്തില്‍ കാളിദാസനാണ് ആദ്യമായി നായികയുടെ അധരത്തെ തൊണ്ടിപ്പഴത്തോട് ഉപമിച്ചുകണ്ടത്. ശേഷമൊരുപാട് പേര്‍ അതെടുത്ത് ഉപയോഗിക്കുകയും ചെയ്തു. ശ്രദ്ധേയമായിത്തോന്നിയത് അദ്ദേഹത്തിന്റെ പ്രകൃതിനിരീക്ഷണ പാടവമാണ്. കൃത്യമായി പക്വതവന്ന തൊണ്ടിപ്പഴത്തിനു മാത്രമേ അധരരൂപമുള്ളു. അത്തരമൊരു പടം കയ്യിലില്ലാത്തതിനാല്‍ ഒരു പച്ചക്കായയുടെ ചിത്രം കൊടുക്കുന്നു, പഴുത്ത നിറം അതില്‍ സങ്കല്‍പ്പിച്ചു നോക്കൂ...

“തന്വീ ശ്യാമാ ശിഖരദശനാ പക്വബിംബാധരോഷ്ഠീ
മദ്ധ്യേ ക്ഷാമാ ചകിതഹരിണീപ്രേക്ഷണാ നിന്മനാഭീ..”
എന്ന് യക്ഷന്‍ തന്റെ കാമിനിയെ വര്‍ണ്ണിക്കുന്നു. പക്വത വന്ന ബിംബം- തൊണ്ടിപ്പഴത്തോടാണ് ദാസേട്ടന്‍ നായികയുടെ അധരോഷ്ഠിയുടെ സാമ്യം കാണുന്നത്. ഇത്തിരി മുന്നേയായ പഴം പച്ചയും ഇത്തിരി വാര്‍ദ്ധക്യം ബാധിച്ച പഴം തൊള്ള പൊളിച്ചു കരയുന്ന കുഞ്ഞിന്റെ വായ പോലെയും ഇരിക്കും.

ആ പക്വം കാണാനുള്ള പക്വത മേഘദൂതം വിവര്‍ത്തനം ചെയ്തവര്‍ക്കില്ലാതെപോയെന്നു വേണം മനസ്സിലാക്കാന്‍.
“മാനഞ്ചും കണ്ണ്, തൊണ്ടിച്ചൊടി, ശിഖരമണിപ്പല്ലു പോര്‍ക്കൊങ്കമൊട്ടാ‍ാലാനമ്രം മേനി...”
എന്നെഴുതിയ ജി ശങ്കരക്കുറുപ്പും
“ഉടലൊതുങ്ങിയോള്‍ മദ്ധ്യം ചുരുങ്ങിയോള്‍ ചൊടികള്‍ തൊണ്ടിപ്പഴം പോള്‍ വിളങ്ങുവോള്‍
അരിയകൊച്ചരിപ്പല്ലും ഭയന്നമാന്‍ മിഴികളും നി‌മ്നനാഭിയുമുള്ളവള്‍...” എന്നു പരിഭാഷിച്ച കവിയും (വലിയ കോയിത്തമ്പുരാനാണോ?) ആ പക്വത്തിന്റെ പ്രാധാന്യം കണ്ടില്ലെന്നു വേണം കരുതാന്‍.

പണ്ടുപണ്ട്, ഏജ് ഓഫ് എമ്പയര്‍ എക്സ്പാന്‍ഷനും സോളിറ്റയറും വരുന്നതിനു മുന്നേ ഓഫീസില്‍ ഒരു പണിയും ഇല്ലാതെയിരിക്കുമ്പോള്‍ കളിച്ച ഡിഗ്ഗറിന്റെ ഓര്‍മ്മ വരുന്നോ ഈ പൊളിഞ്ഞ തൊണ്ടിയുടെ തൊണ്ട് കാണുമ്പോള്‍?

[പോസ്റ്റ് ഞാന്‍ കണ്ടിട്ടില്ലാത്ത ഒരു മരം പരിചയപ്പെടുത്തിയ ആഷയ്ക്കു സമര്‍പ്പിച്ചു]

കടച്ചീട്ട്‌

2006-12-04T01:55:00.000-08:00

കടത്തില്‍ കുരുങ്ങുന്നതില്‍ ഒരു നാട്ടുകാരും പിന്നോക്കമല്ല, മലയാളിയും തഥൈവ. നാട്ടിന്‍പുറത്ത്‌ ജീവിക്കുമ്പോള്‍ ഐ ആര്‍ ഡി പി ലോണില്‍ കുരുങ്ങും, പട്ടണത്തില്‍ കഴുത്തില്‍ സ്വയമിടുന്ന കുരുക്ക്‌ കണ്‍സ്യൂമര്‍ ലോണായി, നഗരത്തില്‍ ക്രെഡിറ്റ്‌ കാര്‍ഡും കൂടിയായി. ഗള്‍ഫ്‌ മലയാളികള്‍ ക്രെഡിറ്റ്‌ കാര്‍ഡ്‌ കടക്കെണിയില്‍ കുരുങ്ങുന്നതിനെക്കുറിച്ച്‌ എന്തെങ്കിലും എഴുതാന്‍ ഫോണില്‍ ഒരാള്‍ ആവശ്യപ്പെട്ടതിനാല്‍ പണത്തിന്റെ വഴിയെന്ന സീരീസില്‍ ഉദ്ദേശിച്ച പല അദ്ധ്യായങ്ങളും ചാടി കടന്ന് പ്ലാസ്റ്റിക്ക്‌ പണത്തില്‍ എത്തേണ്ടിവന്നതാണ്‌.

ഇന്നത്തെ രീതിയില്‍ പ്രവര്‍ത്തിക്കുന്ന ആദ്യ കടച്ചീട്ട്‌- ഡൈനേര്‍സ്‌ ക്ലബ്‌ കാര്‍ഡ്‌ നിലവിലായിട്ട്‌ അന്‍പത്തഞ്ചു വര്‍ഷം കഴിയുന്നു. ബാങ്ക്‌ ഓഫ്‌ അമേരിക്ക വിസ കാര്‍ഡെന്ന മര്‍ച്ചന്റ്‌ ക്രെഡിറ്റ്‌ ബാങ്കിംഗ്‌ രീതിക്ക്‌ ലൈസന്‍സിംഗ്‌ ഏര്‍പ്പെടുത്തിയിട്ട്‌ മുപ്പതും. നാഗരിക മനുഷ്യന്റെ ജീവിത ശൈലിയെ മാറ്റാന്‍ ക്രെഡിറ്റ്‌ കാര്‍ഡിന്‌ ആയി.

ക്രെഡിറ്റ്‌ കാര്‍ഡ്‌ എങ്ങനെ പ്രവര്‍ത്തിക്കുന്നു?
1. പോയിന്റ്‌ ഓഫ്‌ സെയില്‍ മെഷീന്‍ വഴി:
കടച്ചീട്ട്‌ വഴി കച്ചവടം നടത്താന്‍ താല്‍പ്പര്യമുള്ള കച്ചവടക്കാര്‍ അത്തരം ക്രയങ്ങള്‍ സ്വീകരിക്കാനുള്ള ഒരു ടെര്‍മിനല്‍ - പോയിന്റ്‌ ഓഫ്‌ സെയില്‍ മെഷീന്‍, എതെങ്കിലും മര്‍ച്ചന്റ്‌ ബാങ്കറില്‍ നിന്നും വാങ്ങി വയ്ക്കുന്നു. (ടെലെഫോണ്‍ വഴിയും വയര്‍ലസ്സ്‌ വഴിയും കച്ചവ്വടക്കാരന്റെ കാര്‍ഡ്‌ മെഷീനെ ബാങ്കിന്റെ നെറ്റ്‌ വര്‍ക്കുമായി ബന്ധിപ്പിക്കാം) .

ഉപഭോക്താവ്‌ തന്റെ ക്രെഡിറ്റ്‌ കാര്‍ഡ്‌( മിക്കവാറും മൂന്നേ അരയ്ക്കാലിഞ്ച്‌ നീളവും രണ്ടേ അരയ്ക്കാല്‍ ഇഞ്ച്‌ വീതിയുമുള്ള കാന്തിക റേന്തയും ചിലപ്പോള്‍ സെക്യൂരിറ്റി ചിപ്പും ഘടിപ്പിച്ച പ്ലാസ്റ്റിക്ക്‌ ചീട്ട്‌) കച്ചവടക്കാരനു നല്‍കുമ്പോള്‍ അയാള്‍ അത്‌ യന്ത്രതിന്റെ നിശ്ചിത ചാലില്‍ ഉരച്ച്‌ കിട്ടേണ്ട പണവും ചേര്‍ക്കുന്നു. ഇലക്ര്ട്രോണിക്ക്‌ സന്ദേശം വഴി കാര്‍ഡ്‌ മെഷീനിന്‌ മര്‍ച്ചന്റ്‌ ബാങ്കറിലൂടെ ക്രെഡിറ്റ്‌ കാര്‍ഡ്‌ നെറ്റ്വര്‍ക്കില്‍ കയറി ഈ കാര്‍ഡ്‌ നിലവില്‍ ഉണ്ടോ എന്നും അതിന്റെ ഉടമക്ക്‌ ഇത്രയും കട പരിധി കാര്‍ഡ്‌ കൊടുത്ത ബാങ്ക്‌ അനുവദിച്ചിട്ടുണ്ടോ എന്നും ചെക്ക്‌ ചെയ്യാനാവും. ശേഷം മെഷീന്‍ ഈ പണമിടപാടിനെ ഒരു ഇലക്ട്രോണിക്ക്‌ ട്രാന്‍സാക്ഷന്‍ ആയി രേഖപ്പെടുത്തുന്നു. ഈ ഈടപാടില്‍ ഒരു ചെറിയ ശതമാനം (മിക്കാവാറും 1.5%) മര്‍ച്ചന്റ്‌ ബാങ്കിന്‌ കച്ചവടക്കാരനില്‍ നിന്നും കമ്മീഷന്‍ ആയി ലഭിക്കും.

ഈ ഇടപാടിന്‌ ഒരു രശീതി പ്രിന്റ്‌ ചെയ്ത്‌ ശീട്ടുടമയുടെ ഒപ്പിട്ടു വാങ്ങുക പതിവാണ്‌. ഭാവിയില്‍ തര്‍ക്കങ്ങള്‍ ഉണ്ടാകാതെ ഇത്‌ സൂക്ഷിക്കുന്നു. എന്നാല്‍ ഈ ഒപ്പില്ലെങ്കിലും ഈ ഇടപാടിന്‌ ഒരു വത്യാസവും വരുന്നില്ല.

2. ഇന്റര്‍നെറ്റ്‌, ദീര്‍ഘദൂര വിക്രയങ്ങള്‍
ശീട്ട്‌ മെഷീനില്‍ ഉരക്കുന്നതിനു പകരം ഒരു കമ്പ്യൂട്ടര്‍ പ്രോഗ്രാമിന്‌ കാര്‍ഡിന്റെ നമ്പര്‍ കൊടുത്ത്‌ മുകളില്‍ പറഞ്ഞ ട്രാന്‍സാക്ഷന്‍ നടത്താനാവും. ഷോപ്പിംഗ്‌ കാര്‍ട്ട്‌ എന്ന് പൊതുവില്‍ അറിയുന്ന എലക്ട്രോണിക്ക്‌ വാണിജ്യ സംവിധാനത്തിന്റെ ഭാഗമായാണ്‌ സാധാരണ ക്രെഡിറ്റ്‌ കാര്‍ഡ്‌ പ്രോസസ്സിംഗ്‌ ഓണ്‍ലൈന്‍ ചെയ്യാറ്‌.

മര്‍ച്ചന്റ്‌ ബാങ്ക്‌ കാര്‍ഡ്‌ ഉടമയുടെ ബാങ്കിനെ ഈ വിക്രയങ്ങള്‍ കൈമാറി പണം കൈപറ്റുന്നു. ബാങ്ക്‌ അത്‌ ഉടമയുടെ അക്കൌണ്ടില്‍ കൂട്ടിച്ചേര്‍ത്ത്‌ കടമായി കണക്കു കൊള്ളിക്കുകയും ഒന്നിച്ചോ തവണയായോ ഈടാക്കുകയും ചെയ്യുന്നു.

കടച്ചീട്ടിന്റെ ഗുണങ്ങള്‍
സാധന സേവനങ്ങള്‍ വാങ്ങുന്നത്‌ രൊക്കം പണം കൈവശമില്ലാത്തത്‌ തടസ്സപ്പെടുത്തില്ല.

ബാങ്കുകളുടെ ബില്ലിംഗ്‌ സൈക്കിള്‍ (മിക്കപ്പോഴും 56 ദിവസം വരെ) കാലത്ത്‌ പറ്റു തുക പലിശയില്ലാത ഹ്വസ്വ കാല കടം ആകുന്നു.

ഇന്റര്‍നെറ്റില്‍ നിന്നും മറ്റും സാധനങ്ങള്‍ വാങ്ങാനും ഹോട്ടലുകളും മറ്റും ബുക്ക്‌ ചെയ്യാനും ക്രെഡിറ്റ്‌ കാര്‍ഡുകളാലെ സാധിക്കുന്നു.

രാജ്യാന്തര യാത്രികര്‍ പല നാട്ടിലെ പണം കൊണ്ടു നടക്കേണ്ടത്‌ ഒഴിവായി കിട്ടുന്നു.

കടച്ചീട്ടിന്റെ അപകടങ്ങള്‍
നിങ്ങളില്‍ ഒരു കമ്പത്സീവ്‌ ഷോപ്പര്‍-കണ്ട കടച്ചാണിയെല്ലാം വേണമെന്ന് തോന്നുന്ന ഉപഭോക്താവ്‌- ഒളിഞ്ഞിരിപ്പുണ്ടെങ്കില്‍ ക്ഷണം മൂക്കറ്റം കടത്തില്‍ മുക്കാന്‍ ക്രെഡിറ്റ്‌ കാര്‍ഡിനാവും.

പലപ്പോഴും പണം അധികമുള്ള കാലത്തു വാങ്ങാം എന്നു മുന്നോട്ടു തള്ളുന്ന കാര്യങ്ങള്‍ പണമുണ്ടാവും മുന്നേ വാങ്ങിപ്പോകാന്‍ ക്രെഡിറ്റ്‌ കാര്‍ഡ്‌ കാരണക്കാരനാവുന്നു.

താങ്ങാവുന്നതിലും വലിയൊരു ജീവിത രീതി നയിക്കാന്‍ ചിലര്‍ക്ക്‌ ക്രെഡിറ്റ്‌ കാര്‍ഡ്‌
കാരണമാവുന്നു (കുറച്ചു കാലത്തേക്കേ ഇതു പറ്റൂ എന്ന് പ്രത്യേകിച്ച്‌ പറയേണ്ടതില്ലല്ലോ)

ഗള്‍ഫു മലയാളിക്ക്‌ പണം കുത്തിയൊലിച്ചു പോകുന്ന നാട്ടില്‍പ്പോക്ക്‌, ബന്ധുക്കളുടെ കല്യാണം മുതലായ അവസരങ്ങളില്‍ ഈ ശീട്ട്‌ എരിതീയില്‍ സ്നേഹപൂര്‍വ്വം പെട്രോള്‍ ഒഴിച്ചു തരുന്നു.

മുടങ്ങുന്ന തവണകള്‍ക്കുള്ള പിഴ, ഒളിച്ചുവച്ച ചാര്‍ജ്ജുകള്‍, ബാക്കിക്കടത്തില്‍ കൊള്ളപ്പലിശ എന്നിങ്ങനെ പല രീതിയില്‍ ബാങ്ക്‌ നിങ്ങളെ പിഴിയാനുള്ള സാദ്ധ്യത.

കാര്‍ഡിനെ എങ്ങനെ മെരുക്കാം?
1. ആദ്യമായി, ആവശ്യമുള്ള ലിമിറ്റ്‌ മാത്രമുള്ള ഒന്നോ പരമാവധി രണ്ടോ കാര്‍ഡ്‌ മതി. ആവശ്യമെന്നാല്‍ ഒരുമാസത്തെ സാധാരണ ജീവിതച്ചിലവും പിന്നെ വല്ലപ്പോഴും ഒരിക്കല്‍ വരുന്ന കണ്‍സ്യൂമര്‍ സാധനങ്ങളുടെയോ വിനോദയാത്രയുടെയോ ചിലവ്‌ താല്‍ക്കാലികമായി താങ്ങാനുള്ള ഒരു തുകയും വരവു വയ്ക്കാന്‍ മാത്രം പോന്ന പണം. ഒരു മാസത്തെ വരവു ചിലവ്‌ കണക്ക്‌ കുറിച്ചു വച്ചാല്‍ ഈ തുകയെ കൃത്യമായിത്തന്നെ ബാക്കി ഭേദഗതികള്‍ വരുത്തി നിശ്ചയിക്കാന്‍ ആവും.

2. മുകളിലെ ലിമിറ്റ്‌ മറ്റ്‌ ആശ്രിത ചീട്ടുകള്‍ - ഭാര്യക്കോ മക്കള്‍ക്കോ മാതാപിതാക്കള്‍ക്കോ എടുത്തു കൊടുത്ത കാര്‍ഡ്‌ ഉള്‍പ്പടെ കൂട്ടി വേണം കണക്കാക്കാന്‍.

3. ഗണ്യമായ ചിലവുള്ള കണ്‍സ്യൂമര്‍ ഡ്യൂറബിളുകളെ ബാങ്ക്‌ ലോണ്‍ വഴി വാങ്ങുന്നതാന്‌ ആദായകരം. പലിശക്കെണിയെക്കുറിച്ച്‌ താഴെ കുറിച്ചിരിക്കുന്നത്‌ വായിക്കുക. മാത്രമല്ല, ഇത്തരം ഇടപാടുകളില്‍ കടകള്‍ മിക്കപ്പോഴും മര്‍ച്ചന്റിന്റെ കമ്മീഷനും കൂടി വിലയില്‍ കൂട്ടിച്ചേര്‍ത്ത്‌ ഈടാക്കും. ഉദാഹരണം ദുബായിലെ സ്വര്‍ണ്ണ വ്യാപാരികള്‍ ഏതാണ്ട്‌ മൊത്തത്തില്‍ ഈ പാസ്സ്‌ ഓണ്‍ രീതി അവലംബിക്കുന്നു .

4. സുഖഭോഗകേന്ദ്രങ്ങളില്‍- ബാറുകള്‍, മുജ്‌റാ കേന്ദ്രങ്ങള്‍ (ദില്‍ബന്‍ കേള്‍ക്കുന്നുണ്ടോ) തുടങ്ങിയ സ്ഥലങ്ങളില്‍ ക്രെഡിറ്റ്‌ കാര്‍ഡ്‌ കൊടുക്കുന്നവര്‍ക്ക്‌ താമസമില്ലാതെ നൈലോണ്‍ റോപ്പ്‌ വാങ്ങാം.

5. കാര്‍ഡില്‍ ബാക്കി വയ്ക്കുന്ന തുകക്ക്‌ മാസാമാസം 2 ശതമാനം മുതല്‍ മേല്‍പ്പോട്ട്‌ കൂട്ടുപലിശ ഈടാക്കും നിങ്ങളുടെ ബാങ്ക്‌ അതായത്‌ വര്‍ഷത്തില്‍ 27 ശതമാനത്തോളം. ബ്ലേഡ്‌ പലിശയ്ക്കടുത്തുവരുന്ന ഈ ചാര്‍ജ്ജിനു കാര്‍ഡന്റെ നട്ടെല്ലൊടിക്കാനാവും. കാര്‍ഡില്‍ പണം ബാക്കിയാവുന്തോറും നമ്മള്‍ കൂടുതല്‍ കടത്തില്‍ മുങ്ങിക്ക്കൊണ്ടേയിരിക്കുന്നു. നിങ്ങളുടെ ബാങ്കിന്‌ ക്രെഡിറ്റ്‌ കാര്‍ഡ്‌ ഇനത്തിലെ ആദായം ഈ പലിശ, സര്‍വീസ്‌ ചാര്‍ജ്ജുകള്‍ തവണ മുടക്കല്‍ പിഴ എന്നിവ ആയതിനാല്‍ ചില ബാങ്കുകളെങ്കിലും പരമാവധി നിങ്ങളെ കടക്കെണിയില്‍ പെടുത്താന്‍ ശ്രമിക്കും, ക്ലീന്‍ കാര്‍ഡില്‍ കാര്യമായി ഒന്നും ബാങ്കിനു തടയില്ല.

6. സുരക്ഷിതമായ സ്ഥലങ്ങളില്‍ മാത്രം ക്രെഡിറ്റ്‌ കാര്‍ഡ്‌ കൊടുക്കുക. ചില രാജ്യങ്ങളില്‍ കടകളിലെ ജീവനക്കാര്‍ കാര്‍ഡ്‌ വിവരം പുറത്തുള്ള അജ്ഞാതര്‍ക്ക്‌ കൈമാറി ഉടമസ്ഥര്‍ക്ക്‌ സ്ഥിരം ചതിവു പറ്റാറുണ്ട്‌ പലപ്പോഴും നിയമവിരുദ്ധമായ കാര്യങ്ങള്‍ക്ക്‌, മയക്കുമരുന്ന്, ആയുധങ്ങള്‍ തുടങ്ങിയവ വാങ്ങാന്‍ വരെ നിങ്ങളുടെ കാര്‍ഡ്‌ ഉപയോഗിക്കപ്പെട്ട്‌ ധനനഷ്ടത്തെക്കാള്‍ വലിയ അപകടങ്ങളില്‍കൂടി ചെന്നു പെട്ടേക്കാം.

7. ഇന്റര്‍നെറ്റില്‍ കാര്‍ഡ്‌ കൊടുക്കുമ്പോള്‍ ആരാണ്‌ മര്‍ച്ചന്റ്‌ കോ-ഓര്‍ഡിനേറ്റര്‍ (ഉദാ- വേരിസൈന്‍ മുതലായ കൊള്ളാവുന്നവര്‍ ആണോ) എന്തുമാത്രം സെക്വര്‍ ആണ്‌ നമ്പര്‍ പുറത്തു കൊടുക്കുന്നത്‌ എന്നൊക്കെ ഉറപ്പുവരുത്തുക. മാത്രമല്ല ഇന്റര്‍നെറ്റ്‌ ഉപയോഗത്തിന്‌ മാത്രമായി ചെറിയ വളരെ ചെറിയ പരിധിയുള്ള, ഓരോ ട്രാന്‍സാക്ഷനും പരമാവധി വച്ച, നെറ്റ്‌ യൂസ്‌ ഇന്‍ഷ്വറന്‍സുമുള്ള ഒരു കാര്‍ഡ്‌ വയ്ക്കുന്നത്‌ ബുദ്ധിയായിരിക്കും.

അപായ സൂചനകള്‍
1. മിനിമം തിരിച്ചടവ്‌ മാത്രമായി കാര്‍ഡ്‌ ഏറെക്കാലം നിലനിന്നാലോ
2. ഒരു ക്രെഡിറ്റ്‌ കാര്‍ഡില്‍ നിന്നും പണം വലിച്ച്‌ മറ്റൊന്നിന്റെ തവണ അടയ്ക്കേണ്ടി വന്നാലോ
3. തവണകള്‍ പണമില്ലാത്തതിനാല്‍ മുടങ്ങാന്‍ തുടങ്ങിയാലോ
4. ഓരോ കാര്‍ഡ്‌ നിറയുന്നതിനാല്‍ അടുത്തതിലേക്ക്‌ പോകേണ്ടി വന്നാലോ
നിങ്ങള്‍ ഉറപ്പായും കടക്കെണിയില്‍ പെടാന്‍ പോകുന്നു.
ഈ അവസ്ഥയില്‍ നല്ല പോം വഴി കാര്‍ഡ്‌ ബാലന്‍സിനെ ഒരു ടേം ലോണ്‍ ആക്കി മാറ്റിയ ശേഷന്‍ കാര്‍ഡ്‌ ക്യാന്‍സല്‍ ചെയ്യുകയാണ്‌. തല്‍ക്കാലം കാര്‍ഡ്‌ കൊണ്ടുനടക്കാന്‍ നിങ്ങള്‍ക്ക്‌ ത്രാണിയില്ല.

ചുരുക്കം
വരവിനു മുന്നേ ചെലവു ചെയ്യാനുള്ള സംവിധാനമാണ്‌ ക്രെഡിറ്റ്‌ കാര്‍ഡ്‌. അതുപയോഗിക്കും മുന്നേ സമീപ ഭാവിയിലെ വരവ്‌ എണ്ണി തിട്ടപ്പെടുത്തി വയ്ക്കുക. മര്‍ഫിച്ചന്റെ തത്വം ഓര്‍മ്മയുണ്ടല്ലോ?
"When your outgo exceeds your income, your upkeep will be a downfall"

വാല്‍ക്കഷണം:
നാട്ടില്‍ പോയ വഴി ഒരു സുഹൃത്തിന്റെ അനിയനെ കണ്ടു. അവന്‍ ഇപ്പോള്‍ ഇന്റര്‍നെറ്റ്‌ കഫേ നടത്തുന്നു. കച്ചവറ്റം എങ്ങനെ ഉണ്ടെന്നു തിരക്കി
"കുറേ ഡെഡിക്കേറ്റഡ്‌ യൂസര്‍മാര്‍ ഉണ്ട്‌. നമ്മടെ രായണ്ണന്‍ ആണ്‌ മെയിന്‍ കസ്റ്റമര്‍" അവന്‍ പറഞ്ഞു.
"ആര്‌ തൊട്ടി രായനോ? അവന്‍ ഇന്റര്‍നെറ്റില്‍ എന്തു ചെയ്യുന്നു? പടം കാണുകയാണോ?"
"അല്ലല്ല. രായണ്ണന്‌ ഇപ്പോള്‍ വണ്ടിയുടെയും ക്രെഡിറ്റ്‌ കാര്‍ഡിന്റേയും ഡിഫാള്‍ട്ടികളെ പിടിക്കുന്ന പണിയാ. എന്നും രാവിലേ വന്ന് ബാങ്ക്‌ പോര്‍ട്ടലുകളില്‍ ലോഗ്‌ ചെയ്യും എന്നിട്ട്‌ ഇടിക്കാനുള്ള ആളുകളുടെ ലിസ്റ്റ്‌ എടുത്തു പോകും. വൈകുന്നേരം വീണ്ടും വന്ന് ഫീഡ്‌ ബാക്ക്‌ മെയില്‍ അയക്കും-
party1 - done, party 2 - pending, party 3 trying ..
[ക്രെഡിറ്റ്‌ കാര്‍ഡിലെ പണം കൊടുക്കാന്‍ ഉള്ളവരെ ആഗോള തലത്തില്‍ അരിച്ച്‌ കണ്ടുപിടിക്കാന്‍ അവര്‍ക്ക്‌ സംവിധാനങ്ങളുണ്ട്‌]

പണമ്പുരാണം

2006-10-30T03:26:00.000-08:00

[പത്തു വയസ്സില്‍ താഴെയുള്ള കുട്ടികള്‍ക്കുള്ള പാഠമാണ്‌. ബൂലോഗ വല്യപ്പന്മാരും വല്യമ്മമാരും കുത്തിയിരുന്നു വായിച്ച്‌ "അയ്യേ ഇതാണോ" എന്നാലോചിച്ചാല്‍ -എന്റെ പേരില്‍ കുറ്റമില്ല ഞാന്‍ പറഞ്ഞു മാറി നില്‍ക്കാന്‍ ഡിംഗ്‌ ഡോങ്ങ്‌ ഡിം"]

ക്ലാസ്സ് സാമ്പത്തിക ശാസ്ത്രമാണ്. സാമ്പത്തിക ശാസ്ത്രമെന്നാല്‍ സമ്പത്തിനെക്കുറിച്ചുള്ള ശാസ്ത്രം. സമ്പത്തിന്റെ അളവാണ് പണം. രാവിലേ എഴുന്നേറ്റപ്പോള് പല്ലു തേച്ച ബ്രഷ് മുതല്‍ നിങ്ങള്‍ ഇപ്പോള്‍ ഇരിക്കുന്ന ബെഞ്ച് വരെ പണം കൊടുത്തു വാങ്ങിയതാണ്. അറിഞ്ഞോ അറിയാതെയോ, നേരിട്ടോ അല്ലാതെയോ പണം വാങ്ങുകയും കൊടുക്കുകയും പണം കൊണ്ടു നേടിയവ ഉപയോഗിക്കുകയും ചെയ്യുന്നതാണ്, അതായത് പണം നേടുന്നതും പണം ഉപയോഗിക്കുന്നതുമാണ്, നമ്മുടെ നിത്യവൃത്തിയിലെ ഒട്ടുമിക്ക കാര്യങ്ങളും. അഞ്ചു കൊല്ലം മുന്നേ ടെലിവിഷനു മുടക്കിയ പണവും, അടുത്ത മാസം വൈദ്യുതി ബോര്ഡിനും കേബിള് റ്റീവിക്കാരനും കൊടുക്കേണ്ട പണവും, കസേര പണിത ആശാരിക്ക് എന്നോ കൊടുത്ത പണവും വീടിനു അടുത്ത ഇരുപതു കൊല്ലം ബാങ്കില്‍ കൊടുക്കേണ്ട പണവും കുറേശ്ശെ വിനിയോഗിച്ചാണ് ഇന്നലെ കപ്ലിങ്ങാടന്‍ എഴുതിയ ജംഗിള്‍ ബുക്ക് കാര്‍ട്ടൂണ്‍ സീരിയല്‍ കണ്ടത്.

പണമില്ലെങ്കില്‍ പിണം എന്ന അവസ്ഥ എങ്ങനെ ഉണ്ടായി? അതറിയണമെങ്കില്‍ പണം എന്തെന്നറിയണം.പണമെന്തെന്നറിയാന്‍ പണമെങ്ങനെ ഉണ്ടായെന്നും അറിയണം. ശരി, സാമ്പത്തിക ശാസ്ത്രം ഒന്നാമത്തെ ക്ലാസ്സ് അതിനെക്കുറിച്ചാണ്.

1. ക്രയവിക്രയങ്ങളുടെ ഉല്‍പ്പത്തി.
പണ്ടു പണ്ട് ഞാന് രാവിലേ എന്റെ ഗുഹയില്‍ നിന്നും കുന്തവുമെടുത്ത് വേട്ടക്കിറങ്ങി. ഒരു മാനിനെ കിട്ടിയെങ്കില്‍.. മാന്‍ സ്റ്റീക്ക്
വേണമെന്നു പറഞ്ഞു പിള്ളേരു എന്നും ബഹളമാ, പക്ഷേ പറഞ്ഞിട്ടെന്തു കാര്യം, ഇതിന്റെ പിന്നാലെയോടാനുള്ള വേഗത എനിക്കില്ലാത്തതുകൊണ്ട് ഈ ജന്തുവിനെ കിട്ടാറില്ല. ദിവസം മുഴുവന് തപ്പി. കിം ഫലം, അല്ല പശു? ഒടുക്കം മടുത്ത് പൊന്തക്കുള്ളിലല്‍ നിന്നും കിട്ടിയ അഞ്ചെട്ടു മുയലിനെയും തല്ലിക്കൊന്നു തിരിച്ചു നടക്കുമ്പോള് "മാനാ ഹോ തും" എന്നൊരു പാട്ട്. നോക്കുമ്പോഴതാ ഉമേശന് ഗുരുക്കള്‍ നടന്നു പോകുന്നു. വെറുതേ കൈവീശിയല്ല. തോളത്ത് ഒരു മാനും. ഗുരുക്കള്‍ വലിയ ഓട്ടക്കാരനാണ്.

ഇങ്ങേരിതു തിന്ന് വയറിളകി പോകട്ടെ എന്നു പ്രാകി പോകാന്‍ തുടങ്ങുമ്പോള്‍ ഐഡിയാ! ഓടി മാനിനെ പിടിക്കുമെങ്കിലും ഇയ്യാള്ക്ക് പൊന്ത തപ്പി മുയലിനെ പിടിക്കാനറിയില്ല. അപ്പോള്‍ തനിക്കു മാന്‍ കൊതി ഉള്ളതുപോലെ ഗുരുക്കള്‍ക്ക് മുയല്‍ക്കൊതി കാണുമല്ലോ. ഈ മുയലിനെ എല്ലാം കൊടുത്താല് പകരം മാന്‍ തരുമോ ആവോ.

പോയി ചോദിച്ചു. ഹാവൂ, പറഞ്ഞു മനസ്സിലാക്കാന് പെട്ട പാട്!. ആദ്യം മാനിനെ തരുമോ എന്നു ചോദിച്ചപ്പോള്‍ ഗദയെടുത്തു എന്റെ തലക്കടിക്കാന്‍ വന്നു. ഒരു തരത്തില്‍ കാര്യം പറഞ്ഞു മനസ്സിലാക്കിയപ്പോള്‍ പുള്ളിക്കും ഭയങ്കര സന്തോഷമായി. മുയ്ക്കലുകളെ കൊടുത്തു മാനിനെ‍ വാങ്ങി.

"ആഹോ, ജോഹോ, ഹാ" എന്ന് യാത്രയും പറഞ്ഞ് രണ്ടു വഴിക്കു നടന്നു പോകുമ്പോള്‍ ദേ പിന്നേം ഐഡിയ. ഇത്രയും വലിയ മാനിനെ കൊണ്ടു വീട്ടില്‍ പോയാല് ആരു തിന്നു തീര്‍ക്കും? പകുതിയെങ്കിലും ചീഞ്ഞു പാഴാകും. ഇഞ്ചിപ്പെണ്ണ് താമസിക്കുന്ന ഏറുമാടത്തിന്റെ നാലു വശവും പച്ചക്കറി വളര്ത്തിയിട്ടുണ്ട്. മാനിന്റെ പകുതി വെട്ടി കൊടുത്ത് പച്ചക്കറി തരുമോന്നു ചോദിച്ചാലോ.

എന്റെ കണ്ടു പിടിത്തം- മാറ്റ കച്ചവടം അഥവാ ബാര്‍ട്ടര്‍ സിസ്റ്റം കാട്ടില്‍ മുഴുവന്‍ പരന്നു. ഇപ്പോ ജീവിതം എളുപ്പമാണ്. തനിയെ എല്ലാം കണ്ടുപിടിക്കുകയോ കൃഷി ചെയ്യുകയോ വേണ്ടാ. നമുക്കുള്ളത് കൊടുത്ത് വേണ്ടുന്നത് വാങ്ങാം.

2. കച്ചവടം വരുത്തിയ പുരോഗതി.
ഞാന്‍ രാവിലേ എഴുന്നേറ്റ് എന്റെ ഏറ്റവും വലിയ സ്കില്‍ ആയ പൊന്ത തപ്പല്‍ തുടങ്ങും. ഗുരുക്കളു മാനിന്റെ പിറകേ ഓട്ടം തുടങ്ങും, ഇഞ്ചി വെറുതേ അമ്പും വില്ലുമെടുത്ത് തെണ്ടണ്ടാ, തോട്ടം നോക്കി വീട്ടിലിരിക്കും, വിശാലന്‍ സില്ക്കിനെ തീറ്റാനിറങ്ങും, സിബു ചൂണ്ടയിടും, അരവിന്ദന് ചക്കയിടും, ദില്‍ബാന്‍ തേനെടുക്കും, ചന്ദ്രേട്ടന്‍ വിത്തു വിതക്കും, അനിലേട്ടന്‍ കിളികളെ ഏറിഞ്ഞിടും. വൈകുന്നേരം ഒരു റൌണ്ട് കച്ചവടം. എല്ലാവര്ക്കും എല്ലാമായി. അവനവന്റെ സവിശേഷ ശേഷികള് അനുദിനം ചെയ്ത് കൂടുതല്‍ മെച്ചപ്പെട്ടു. പുതിയ രീതികള്‍ കൂടി കണ്ടുപിടിച്ചു. കിളി മുട്ട എടുക്കാന്‍ മരത്തില്‍ പൊത്തിപ്പിടിച്ചു കയറണ്ടാ പകരം കാട്ടുകോഴികളെ ഒരു കൂടുണ്ടാക്കി അടച്ച് തീറ്റയിട്ടു കൊടുത്താല് മതി എന്ന് അനിലേട്ടന് പരീക്ഷിച്ചറിഞ്ഞു. അരവിന്ദനും ദില്ബനും ഇപ്പോള് കാലില് വള്ളി കൂട്ടി കെട്ടിയാണ് മരം കയറ്റം, ഊര്‍ന്നു വീണു പോകുമെന്ന ഭയമേ വേണ്ട.

ചന്തകള്‍ സ്വാഭാവികമായും ഉണ്ടായി. എല്ലാവരും ഒരിടത്തു കൂടിയാല് കൈമാറ്റത്തിന് വളരെ കുറഞ്ഞ സമയം അല്ലേ എടുക്കൂ.

3. സേവനങ്ങളുടെ ജനനം.
ഇന്ഡ്യാ ഹെറിറ്റേജ് എന്നയാള്‍ക്ക് അറിയാത്ത പച്ച മരുന്നുകളില്ല. പക്ഷേ പറഞ്ഞിട്ടെന്തു കാര്യം, പുള്ളിക്ക് ഇഷ്ടമുള്ളവര്‍ക്കേ അതു കൊടുക്കുമായിരുന്നുള്ളു. ഇപ്പോള്‍ കുറുക്കന്‍ കടിച്ചാല്‍ പുള്ളിയുടെ ഗുഹക്കു മുന്നില്‍ കരഞ്ഞു കാത്തിരിക്കണ്ടാ, മരുന്നുണ്ടാക്കാനുള്ള ആട്ടിന്‍ മാംസം കൊടുത്താല്‍ മതി ഇങ്ങോട്ടു വന്ന് ചികിത്സിക്കും. ആടില്ലേ? ഓടണ്ടാ, യാത്രാമൊഴിക്ക് മുയലു കൊടുത്ത് ആടുവാങ്ങാം. സേവനങ്ങളുടെ ഉല്പ്പത്തിയും കച്ചവടം കണ്ടു പിടിച്ചതോടെ അങ്ങനെ തുടങ്ങി. അനംഗാരീടെ പാട്ടൊന്നു കേള്‍ക്കാന്‍ അയാളു പോകുന്നയിടത്തെല്ലാം പോയി കാത്തു നില്ക്കണ്ടാ, തടിയുള്ള ബീഡി രണ്ടെണ്ണം കൊടുത്താല്‍ സ്പോട്ടില്‍ തുടങ്ങും പാട്ട്. സാക്ഷിക്കും കുമാറിനും ഓരോ പൊതി അരി കൊടുത്താല്‍ ഗുഹയുടെ ഭിത്തി മുഴുവന് പടം- ആന കുതിര മുതല്‍ നമ്മുടെ പടം വരെ വരച്ചു തരും.

സാധനം കൊടുത്താല്‍ നമുക്കു വേണ്ടി തല്ലുന്നവന്‍ മുതല്‍ നമ്മുടെ കാര്യം ദൈവത്തോട് സംസാരിക്കുന്നവന്‍ വരെ ഉണ്ടായി. എന്തൊരു മാറ്റം!

4. മൂല്യവും ചരക്കും വേര്‍പിരിയുന്നു
എനിക്കു കുമ്പളങ്ങാ വാങ്ങണം. നേരേ പോയി മുയലുമെടുത്ത് ചന്തക്ക്. അവിടെ ആര്‍ പി കുമ്പളങ്ങാ വില്ക്കുന്നുണ്ട്, പക്ഷേ അവര്‍ക്ക് അരിയാണു വേണ്ടത്. ഞാന്‍ പിടിച്ച മുയലിനു മൂന്നു കൊമ്പുണ്ടെന്നു പറഞ്ഞിട്ടും കൂശ്മാണ്ഡം നഹി ദേത്തി ഹി ഹൂ ഹാ. ചന്ദ്രേട്ടന്റെ കടയില്‍ അരിയുണ്ട്, പക്ഷേ പക്ഷേ പുള്ളിക്കു ചെമ്മീന്‍ വേണം, സിബുവിന്റെയടുത്ത് ചെമ്മീനുണ്ട് പക്ഷേ മൂപ്പര്‍ക്ക് കറിവേപ്പില വേണം. ഒടുക്കം സൂവിന്റെ കയ്യില്‍ മുയലേല്‍പ്പിച്ചു കറിവേപ്പില വാങ്ങി സിബുവിനു കൊടുത്തു ചെമ്മീന്‍ വാങ്ങി ചന്ദ്രേട്ടനെ ഏല്പ്പിച്ച് അരിവാങ്ങി ആര്‍പ്പിക്കു കൊടുത്തു കുമ്പളങ്ങാ വാങ്ങി. ചന്തയില്‍ ഇരുന്ന് രണ്ടു ചിരട്ട വെള്ളവും കുടിച്ചു. എന്തൊരു മിനക്കേട്.

എന്താണ് ഇതിനൊരു പരിഹാരം? എന്റെ മുയലിന്റെ വില- മൂല്യം അതുപോലെ കുമ്പളങ്ങയുടെയും മത്തങ്ങയുടെയും ചെമ്മീനിന്റെയും പാട്ടിന്റെയും ചികിത്സയുടെയും വില ഒരടയാള ചിഹ്നം ആക്കിയാലോ? കല്ലു പെറുക്കി വയ്ക്കാന്‍ പറ്റില്ല, നാട്ടുകാരനെല്ലാം വഴീല്‍ കിടക്കുന്ന കല്ലും പെറുക്കി വരും - കള്ള നാണയം!! അപ്പോള്‍ കിട്ടാന്‍ ബുദ്ധിമുട്ടുള്ള എന്തെങ്കിലും വേണം. കടലിലെ കവിടി ആയാലോ? ഞാന് മുയലിനെ ഇഷ്ടമുള്ളയിടത്ത് കൊടുത്ത് കവിടി വാങ്ങും. ഇഷ്ടമുള്ള സ്ഥലത്ത് ചെല്ലുമ്പോള്‍ അപ്പോള്‍ തോന്നുന്നത് കവിടി കൊടുത്ത് വാങ്ങും.

ഈ സൌകര്യത്തെക്കാള്‍ വളരെ വലിയ ഒന്ന് പണം കൊണ്ടുണ്ടായി. മിച്ചമൂല്യം സൂക്ഷിച്ചു വയ്ക്കാം, സമ്പാദിച്ചു വച്ച് ഒറ്റയടിക്കു ചിലവാക്കാം, മൂല്യം പലിശക്ക് കടം വാങ്ങി കച്ചവടം ചെയ്യാം, മൂല്യം അടുത്ത തലമുറക്കു കൈമാറാം! പണം മനുഷ്യനു പുതിയൊരു ശക്തി നല്കി. അവനെ മുതല്‍ ആളുന്നവന്‍ ആക്കി. മുതലാളികള്‍ അതു ചിലവാക്കി പട്ടാളത്തെയും പണിശാലകളെയും ഗവേഷകരേയും വിലക്കെടുത്തു പുതിയ രാജാക്കന്‍മാര്‍ ഭീഷണിയാല്‍ കൊച്ചു രാജ്യം ഭരിക്കുന്ന ഗുണ്ടകളായിരുന്നില്ല. വന്‍മുതലാളിമാരായിരുന്നു. ശംഖും കല്ലും ജിറാഫിന്റെ വാലും തിമിംഗലത്തിന്റെ പല്ലുമൊക്കെ നാണയമായിരുന്നത് മെല്ലെ സ്വര്‍ണ്ണവും
വെള്ളിയും ചെമ്പും കൊണ്ട് രാജമുദ്രയോടെയുള്ള അംഗീകൃത നാണയങ്ങളായി.

പണത്തിനു മീതെ പരുന്തും പറക്കില്ലെന്നു കണ്ടതോടെ മനുഷ്യനു പണമായി എല്ലാം. മുപ്പതു വെള്ളിക്കാശിനു ദൈവപുത്രനെ വരെ ഒറ്റിക്കൊടുത്തു. അങ്ങനെ പണത്തിനു നീതിയും നിയമവുമൊക്കെ ആവശ്യമായി വന്നു. അക്കഥയൊക്കെ നിങ്ങള് കുറച്ചു കൂടി വലിയ കുട്ടികളാകുമ്പോള്‍ നമുക്ക് പറയാം.

5. നോട്ടുകള്‍ കഥപറയുന്നു.
മിക്കവരും പ്രോമിസ്സറി നോട്ട് കണ്ടിട്ടുണ്ടാവുമല്ലോ? "ഞാന്‍ അതുല്യക്ക് അഞ്ഞൂറു രൂപ കൊടുക്കാനുണ്ട്", " ഒക്റ്റോബര്‍ പത്താം തീയതി ഞാന്‍ അതുല്യക്ക് അഞ്ഞൂറു രൂപ തന്നുകൊള്ളാമെന്ന് വാഗ്ദാനം ചെയ്യുന്നു" " ഒക്റ്റോബര്‍ പത്താം തീയതി, ഈ കടലാസ്സുമായി വരുന്ന ആളിനു ഞാന്‍ അഞ്ഞൂറു രൂപ കൊടുക്കാം". ഇതൊക്കെയാണു പ്രോമിസ്സറി നോട്ട് അതയത് വാ വാഗ്ദാന പത്രം.

എന്നാല് ഒരുമാതിരി രാജ്യങ്ങളിലെല്ലാം " ഈ കടലാസ്സുമായി വരുന്ന ആളിനു ഞാന്‍ നൂറു രൂപ കൊടുക്കാം എന്നു വാഗ്ദാനം ചെയ്യുന്നു" എന്നൊരു പ്രോ നോട്ട് എഴുതാന്‍ നിയമമനുവദിക്കില്ല. ഒന്നുകില്‍ ആളിന്റെ പേരു വേണം, അല്ലെങ്കില് ഒരു തീയതി വേണം, രണ്ടും കൂടിയായാലും വിരോധമില്ല. പക്ഷേ “ഈ പേപ്പറുമായി വരുന്നയാളിനു ഞാന്‍ Rs. 100 കൊടുത്തോളാം” എന്ന് കൊള്ളാവുന്ന ഒരുത്തന്‍ എഴുതിയ പ്രോമിസ്സറി നോട്ട് പണത്തിനു പകരം ഉപയോഗിക്കാം, പണം തരുമെന്ന ഉറപ്പ് പണത്തിനു തുല്യമല്ലേ. അമ്പതു കാശ് എപ്പോള് വേണമെങ്കിലും തരാം എന്ന "കറന്‍സി"യുള്ള (അര്ത്ഥം അ പൊതുവില്‍ അംഗീകരിക്കുന്നത് എന്ന്) പ്രോമിസ്സറി നോട്ട് പണം തന്നെ. കറന്‍സി നോട്ട് എന്ന സാധനത്തിന്റെ ഗുട്ടന്‍സ് ഇത്രയേയുള്ളു. ഇനി ആ പൊതുജനം എഴുതരുതെന്ന് നിയമമുള്ള പ്രോമിസ്സറി നോട്ടിലെ വാചകം ഒന്നു ഇംഗ്ലീഷിലേക്ക് തര്ജ്ജിമ ചെയ്തേ. "I promise to pay the bearer the sum of one hundred rupees"- ഉറപ്പായും ഈ പ്രോമിസ്സ് നിങ്ങള്‍ കണ്ടിട്ടുണ്ട്. ഇല്ലേ? റിസര്വ് ബാങ്ക് ഗവര്ണറാണ് ഇന്ത്യയില്‍ ഈ നോട്ട് ഒപ്പിടുന്നത്.

പ്രാകൃതമായ കറന്‍സികള്‍ മുന്നേ ഉണ്ടായിരുന്നെങ്കിലും ആയിരത്തഞ്ഞൂറു വര്ഷം മുന്നേ ചൈനയിലെ സോങ്ങ് സാമ്രാജ്യമാണ് ശരിയായ രീതിയില്‍ പേപ്പര്‍ കറന്‍സി ആദ്യമായി ഇറക്കിയത്. സ്വര്‍ണ്ണത്തിനും വെള്ളിക്കും ക്ഷാമമുള്ള കാലത്ത് അതിനു പകരം രാജാവൊപ്പിട്ട വാഗ്ദ്നാനപത്രം മതിയെന്ന് അവര് തീരുമാനിച്ചു. സൂക്ഷിക്കാന്‍ എളുപ്പം, മൂല്യം സ്വര്ണ്ണമായി കെട്ടിക്കിടക്കുകയുമില്ല. പേപ്പര്‍ കറന്‍സി ഒരടയാള ചിഹ്നം മാത്രമാണല്ലോ. അതിനാല്‍ സ്വര്ണ്ണം പോലെ അതിനൊരു ആഗോള തലത്തില് ഒറ്റ വില ഉണ്ടാകില്ല എന്നത് പണപ്പെരുപ്പത്തിനു കാരണമായി. ആയിരം വര്‍ഷം നില നിന്ന ചൈനീസ് നോട്ട് ഒടുവില്‍ കഠിനമായ പണപ്പെരുപ്പക്കാലത്ത് മിംഗ് ചക്രവര്ത്തി നിറുത്തലാക്കി. എങ്കിലും ആ രീതി ലോകം മുഴുവന് അനുകരിച്ചു.

ഒരുപാട് ഇനിയും പറയാനുണ്ട്. പണം സത്യമോ അതോ മിഥ്യയോ? ആരാണ് പണത്തിന്റെ വില നിശ്ചയിക്കുന്നത്, എങ്ങനെ പല രാജ്യത്തിന്റെ നോട്ടുകള്ക്ക് പല വില ആയി, പണത്തിന്റെ നാളെയെന്ത്? പണത്തിന്റെ നിയമമെന്താണ്? എപ്പോഴാണ് പണം ഒരു കരാറിന് ആവശ്യമില്ലാത്തത്? fiat അല്ലെങ്കില് ശാസനം എങ്ങനെ സ്വര്‍ണ്ണ തുല്യമായി? നിമിഷങ്ങള്‍ തോറും മാറുന്ന എക്സ്ച്ചേഞ്ച് റേറ്റുകള്‍ ആര് എന്തിനു തീരുമാനിക്കുന്നു.. കുട്ടികള് ഉറക്കം തൂങ്ങി തുടങ്ങി.. അതെല്ലാം വേറൊരു ക്ലാസ്സിലാക്കാം.

പൂച്ചപ്പഴം

2006-10-10T09:40:00.000-07:00

പൂച്ചപ്പഴം അഥവാ കാട്ടുവഴന (ദ്വിധ നാമം syzygium zeylanicum ) തെന്നിന്ത്യയില്‍ ഇന്ത്യയില്‍ മാത്രം കാണുന്ന ചെടിയാണ്‌. യുണൈറ്റഡ്‌ നേഷന്‍സ്‌ എഫ്‌ ഏ ഓ പുറത്തിറക്കിയ ലിസ്റ്റ്‌ പ്രകാരം ഇത്‌ വംശനാശ ഭീഷണി നേരിടുകയാണിന്ന്.

യൂക്കാലിപ്റ്റസ്‌, ചാമ്പ, ഗ്രാമ്പൂ എന്നിവയടങ്ങുന്ന myrtaceae എന്ന വന്‍ കുലത്തിലെ Syzuguim വംശത്തില്‍ വയണ, റോസ്‌ ആപ്പിള്‍, മലബാര്‍ പ്ലം എന്നിവയുടെ കൂടെ പൂച്ചപ്പഴവും കൊച്ചു കുരണ്ടിപ്പുറത്ത്‌ സ്ഥാനം പിടിച്ചിരിക്കുന്നു.

തൂവല്‍ക്കിടക്കപോലെ നിറയേ പൂക്കുന്ന ഈ ചെറുമരത്തില്‍ ഒരു വലിയ നിലക്കടലക്കുരുവിനോളം പോന്ന ധാരാളം വെളുത്ത കായ കുലയായി വര്‍ഷാവര്‍ഷം മാര്‍ച്ച്‌ മുതല്‍ ജൂണ്‍ വരെ വിളയും. ഏകദേശം കാട്ടുചാമ്പയുടെ സ്വാദുള്ള ഭക്ഷ്യയോഗ്യമായ കായകളാണ്‌.

നല്ല വെയിലും ധാരാളം ജലവും ആവശ്യമുള്ള ഈ കാട്ടുചെടി സാധാരണയായി കേരളത്തില്‍ ഉപവനങ്ങളിലും സര്‍പ്പക്കാവുകളിലുമാണ്‌ വളര്‍ന്നു പോന്നിരുന്നത്‌. ഇവരണ്ടും ഏകദേശം മുഴുവനായി ഇല്ലാതായതോടെ ഈ മരവും മിക്കവാറും അപ്രത്യക്ഷമായി.

ചിത്രത്തില്‍ കാണുന്ന പൂച്ചമരം എന്റെ ചേട്ടനും ചേച്ചിയും ( ബ്ലോഗര്‍ പൂച്ചക്കുട്ടിയുടെ അച്ഛനമ്മമാര്‍) തദ്ദേശത്തിന്റെ സ്വാഭാവിക ബയോ ഡൈവേര്‍സിറ്റിയെ എന്തുവിലകൊടുത്തും നിലനിര്‍ത്തുമെന്ന തീരുമാനത്തിന്‍ മേല്‍ കൂമന്‍പള്ളിയില്‍ വളര്‍ത്തുന്നത്‌.

കല വേറൊരു ബ്ലോഗ്ഗില്‍ ഈ മരം ശരിക്കുമുണ്ടോ എന്നു ചോദിച്ചതില്‍ നിന്നും പ്രചോദനം ഉള്‍ക്കൊണ്ട്‌ എഴുതിയ പോസ്റ്റ്‌ ഇത്‌. ഈ മരം ശരിക്കും ഇന്നുണ്ട്‌, പക്ഷേ എത്രകാലമാണാവോ. ഇതിനെ വെട്ടി കറ ഷീറ്റടിച്ചു വില്‍ക്കാനോ ഇതിന്റെ തടികൊണ്ട്‌ വീടു വയ്ക്കാനോ, ഇതിന്റെ പഴം രാവിലേ പുട്ടില്‍ കുഴച്ചു തിന്നനോ മനുഷ്യനു കഴിയില്ലല്ലോ. പൂച്ചപ്പഴത്തിന്റെ ഭാവി ആശങ്കയിലാണ്‌

[പലരേയും ഈ ചിത്രം കാണിച്ച്‌ എന്തെന്നു പറയാമോ എന്ന് ഞാന്‍ ചോദിച്ചിട്ടുണ്ട്‌. ഒരാളേ ഇതുവരെ പൂച്ചപ്പഴത്തെ തിരിച്ചറിഞ്ഞിട്ടുള്ളു. കുട്ടിക്കാലത്തിന്റെ മങ്ങിയ ഓര്‍മ്മകളില്‍ നിന്നും പൂച്ചപ്പഴത്തിനെ തിരിച്ചറിഞ്ഞ സുധച്ചേച്ചിക്ക്‌ ഈ ബ്ലോഗ്‌ സമര്‍പ്പിക്കുന്നു.]

പൂച്ചരോമം പോലെയുള്ള ഈ മരത്തിന്റെ പൂക്കളുടെ ചിത്രം വിഷ്ണുപ്രസാദിനു പൂമ്പാറ്റച്ചിത്രമായി സമര്‍പ്പിച്ചു കഴിഞ്ഞതാണ്‌. ആവര്‍ത്തനം ക്ഷമിക്കുമല്ലോ.

തത്തച്ചേ തത്തച്ചേ പൂമ്മ പൂമ്മ!*

2006-08-28T23:32:00.000-07:00

അപ്പോ ഇന്നു സാമൂഹ്യപാഠം. ആദ്യം ഗുരുകുലത്തില്‍ ചെന്ന് വിദ്യവരുന്ന വഴികണ്ടുപിടിക്കുക. "വിദ്യ വരുന്ന വഴി എനിക്കറിയാം, രാവിലേ ടൈപ്പിംഗ്‌ കഴിഞ്ഞു ചന്തക്കവല വഴി വരും" എന്നു പറഞ്ഞാല്‍ ശരിപ്പെടുത്തിക്കളയും ഞാന്‍.

ശരി. കണ്ടല്ലോ?നാലു കാലേല്‍ ആണു വിദ്യ വരുന്നത്‌ (ഭഗവാനെ ഇവളു വെള്ളമടിയും തുടങ്ങിയോ?) ഗുരുവൊരുത്തനു കാലേ തരാന്‍ കഴിയൂ. ബാക്കി കൂട്ടുകാരോടു ചോദിച്ചോ സ്വയം കണ്ടു പിടിച്ചോ അനുഭവം കൊണ്ടോ എങ്ങനാണെന്നു വച്ചാല്‍ അതുപോലെ കണ്ടു പിടിക്കണം. അസ്സീസ്സി ഗൈഡ്‌, വിദ്യാര്‍ത്ഥിമൂത്രം സര്‍വഞ്ജാനകോശി, മനോരോഗം വാരിക, ഫ്രീ വൈ ഫൈ എനേബിള്‍ഡ്‌ ടൌണ്‍ഷിപ്പ്‌ അങ്ങനെ നൂറ്റി നാലെണ്ണം കൂടി മൈനര്‍ കൈവഴികളായി ഒഴുകിയെത്തുന്നുണ്ടെന്നും എലന്തൂര്‍ ഗുരുക്കള്‍ പറയുന്നു.

അതു വഴികള്‍. ഒരു വഴി വെട്ടിയാല്‍ അതിലേ സാര്‍ത്ഥവാഹക സംഘം കയറി വരില്ലല്ലോ, ഈ വഴി ആള്‍ സഞ്ചാരമുണ്ടാവാന്‍ എന്നതാ ഒരു വഴി?

ഈ വഴിയെല്ലാം വന്ന് അകത്ത്‌ കറങ്ങുന്ന ഒരു റൌണ്ടെബൌട്ട്‌ ഉണ്ട്‌. അത്‌ പ്രജ്ഞ. ഈ പ്രജ്ഞ തെളിയാത്ത കൊജ്ഞാണന്മാരുടെ വഴിയെല്ലാം വെട്ടിത്തുറന്നിട്ടാലും കാര്യമില്ല. “പോത്തിന്റെ ചെവിയില്‍ വേദമോതി, പൊട്ടന്റെ മുന്നില്‍ ചെന്നു ശംഖു വിളിച്ചു” എന്നൊക്കെ ചില പഴഞ്ചൊല്ലുകള്‍ കേട്ടിട്ടില്ലേ.

പ്രജ്ഞയുടെ വിളക്ക്‌ സഹജമായി എല്ലാവര്‍ക്കുമുണ്ട്‌. അതിന്റെ തിരി തെളിക്കാന്‍ ഏറ്റവും പറ്റിയത്‌ അച്ഛനമ്മമാരാണ്‌. പൂര്‍ണ്ണപ്രജ്ഞരായ ഒട്ടുമിക്ക ആളുകളും അച്ഛനെന്നു പറയുമ്പോള്‍ ആശായപരമായ,
ആദര്‍ശപരമായ, താത്വികമായ, വൈഞ്ജാനികമായ, ദാര്‍ശനികമായ ഔന്നത്യത്തിലുള്ള ഒരാള്‍ എന്ന് വിശേഷിപ്പിച്ചാണ്‌ കാണാറ്‌. അപൂര്‍വ്വമായേ എന്റെയച്ഛന്‍ വലിയൊരു കവലച്ചട്ടമ്പി അല്ലെങ്കില്‍ കൈക്കൂലിക്കാരന്‍, വ്യഭിചാരി, സീരിയലുകളുടെ ആരാധകന്‍, ക്ഷുദ്രവാസനകളുള്ളവന്‍ എന്നൊക്കെ പറഞ്ഞു കേള്‍ക്കാറുള്ളൂ.

മക്കള്‍ക്കും അനന്തിരവര്‍ക്കും, കൊച്ചുമക്കള്‍ക്കും അയലത്തെ കുട്ടികളുടെയും മനസ്സില്‍ ജ്ഞാനത്തിന്റെ നാളം കൊളുത്താന്‍ നമുക്കാവും. ഒരു മെഴുകുതിരിയില്‍ നിന്നും മറ്റൊന്നു കൊളുത്തുമ്പോലെ.

വിഷയം ( സ്കോപ്പ്‌, അജെന്‍ഡ എന്നൊക്കെ പറയുന്നത്‌ )കുട്ടികള്‍ അസ്സിമിലേറ്റ്‌ ചെയ്യുകയാണ്‌ (യൂങ്ങും ഫ്രാഡുമൊന്നും പറഞ്ഞതല്ല, എന്റെ തന്നെ ഐഡിയ) അതിലെ ആസക്തിയാണ്‌ അവനെ/ അവളെ നയിക്കുന്നതെന്ന് സത്യവേദം പറയുന്നു. കുട്ടികളുടെ വിഷയത്തില്‍ ഡോക്റ്റര്‍ പട്ടത്തിനും സ്ത്രീധനത്തിനും അഡിഡാസ്‌ ഷൂവിനും എസ്‌ ക്ലാസ്സ്‌ ബെന്‍സിനും ഡീ ബീയര്‍ ഡയമണ്ടിനും, 916 സ്വര്‍ണ്ണാഭരണത്തിനും, കോളനിയിലെ ഏറ്റവും വലിയ വീടിന്റെ ഉടമസ്ഥതക്കും പുറമേ ഞ്ജാനം, സത്യം, നന്മ, സമൂഹം എന്നിവ കൂടി ഉള്‍പ്പെടുത്താന്‍ നമ്മള്‍ ബാദ്ധ്യസ്ഥരാണ്‌. ലോകം അവനവനിലേക്ക്‌ ചുരുങ്ങി പോകാതിരിക്കാന്‍, നാളെക്കു വേണ്ടി എന്തെങ്കിലും മിച്ചം വച്ചേക്കാന്‍..
അപ്പോ ഇന്നത്തെ ഗൃഹപാഠം. അവനവന്‍ തന്നെ കണ്ടുപിടിക്കുക. (ഒരു വരി പഠിപ്പിച്ചാല്‍ നാലു വരി തനിയേ പഠിക്കേണ്ടും പാഠം താന്‍ സാമൂഹ്യപാഠം. )

എന്താണു വിദ്യ? എന്താണു പ്രജ്ഞ?
പ്രജ്ഞയില്ലാതെ വിദ്യക്ക്‌ അര്‍ത്ഥമില്ലാത്തത്‌ എന്തുകൊണ്ട്‌?

എങ്ങനെ ഒരു വിദ്യ സ്വായത്തമാക്കാം? എന്തു തരം വിദ്യകള്‍ നിങ്ങള്‍ പഠിക്ക്കേണ്ടതും പഠിപ്പിക്കേണ്ടതും പഠിക്കാന്‍ പ്രേരിപ്പിക്കേണ്ടതുമുണ്ട്‌?

വിദ്യകൊണ്ടറിയേണ്ടതറിയാതെ
വിദ്വാനായി നടക്കുന്നിതു ചിലര്‍
കുങ്കുമത്തിന്റെ ഗന്ധമറിയാതെ
കുങ്കുമം ചുമക്കുമ്പോലെ ഗര്‍ദ്ദഭം
(പിറകി ഇരുന്നു അടക്കി ചിരിച്ച ആ മൂക്കണാഞ്ചന്‍ എന്താ പറഞ്ഞതെന്ന് എനിക്കു മനസ്സിലായി "സാറേ ഇങ്ങനെ അവനവനെ കുറിച്ച്‌ പാടാതെ" എന്നല്ലേ)എന്നു പാടിയ കവി ആര്‌?

വിദ്യാപതി ആരെന്നറിയാമോ കുട്ടികളേ? ഈ ഞാന്‍ തന്നെ!!
എന്റെ ഭാര്യയുടെ പേരാണു വിദ്യ.

(*പാഠം പഠിക്കും ഞാന്‍ സിന്താവാ സിന്താവാ തത്തച്ചേ തത്തച്ചേ പൂമ്മ പൂമ്മ!എന്നത്‌ അയ്യപ്പ പണിക്കരുടെ കാര്‍ട്ടൂണ്‍ കവിത സീരീസിലെ ആണോ അതോ ഏ എസ്സിന്റെ കാര്‍ട്ടൂണോ? ഈയിടെ ഓര്‍മ്മ ഒട്ടും പിടിക്കുന്നില്ല. സന്തോഷ്‌, ബ്രഹ്മി ഉണ്ടോ?)

കീര്‍ത്തിയളവ്‌

2006-07-24T03:07:00.000-07:00

സ്കൂളവധി തുടങ്ങാനിനി രണ്ടു ദിവസമേയുള്ളു. നമ്മളിതുവരെ അണ്ണാനേം മരപ്പട്ടിയേം നോക്കി നടന്നതേയുള്ളു. അതുകൊണ്ട്‌ ഇന്ന് ഒരു അക്കൌണ്ടന്‍സി ക്ലാസ്സ്‌ ആയാലോ? ശരി, ഇരി.

ഒരു സ്ഥാപനത്തിന്റെ വസ്തു വില എന്നത്‌ അതിന്റെ ആസ്തികളില്‍ നിന്നും ബാദ്ധ്യതകള്‍ കുറക്കുന്നതാണ്‌. പക്ഷേ പെരിങ്ങോടന്റെ ശരവണഭവന്‍ എന്നു പറയുന്ന ഓട്ടലിന്റെ വില അതിനകത്തെ 25 റ്റേബിളും നൂറു ചെയറും ക്യാഷ്‌ രെജിസ്റ്ററും വിലയിട്ട്‌ അതില്‍ നിന്ന് ബാങ്ക്‌ ലോണ്‍ കുറക്കുന്നതാണോ? അല്ലല്ലോ. ആ അദൃശ്യമായ കൂടുതല്‍ വില, അല്ലെങ്കില്‍ കീര്‍ത്തിക്ക്‌ (ഓണറുടെ മകളുടെ പേരല്ല, സല്‍പ്പേരെന്നയര്‍ത്ഥത്തില്‍) അക്കൌണ്ടിംഗ്‌ ഭാഷയില്‍ ഗുഡ്‌വില്‍ എന്നു പേര്‍വിളിക്കുന്നു.

ഒരു സ്ഥാപനത്തിന്റെ ഗുഡ്‌വില്‍ പല രീതിയില്‍ അളക്കാം. തത്വത്തില്‍ ഞാന്‍ ഇന്ന് ശരവണഭവന്‍ പോലൊരു കട അവിടെ തുടങ്ങിയാല്‍ ഉണ്ടാവുന്ന ലാഭത്തെക്കാള്‍ എത്ര കൂടുതല്‍ ശരവണഭവനു കിട്ടുന്നുണ്ടോ അതാണ്‌ ആ കടയുടെ ഗുഡ്‌വില്‍. ഇത്രയും ഏതു പോസീലുകാരന്‍ എഴുതിയ അക്കൌണ്ടിംഗ്‌ പുസ്തകത്തിലും കാണും, പിന്നെ ക്ലാസ്സ്‌ എന്തിന്‌ എന്നാണോ? പറയട്ടെ.

എങ്ങനെ ഗുഡ്‌വില്‍ ഉണ്ടാകുന്നു അല്ലെങ്കില്‍ എന്തെല്ലാം തരം ഗുഡ്‌വില്‍ ഉന്റെന്ന് ഗൂഗിളിനൊടോ കോളേജ്‌ ലൈബ്രറിയോടോ ചോദിച്ചേ. ഉത്തരം വരാന്‍ ഇത്തിരി വിഷമിക്കും, കാരണം അക്കൌണ്ടറുമാര്‍ക്ക്‌ എങ്ങനെ എന്നല്ലാതെ എന്തുകൊണ്ട്‌ എന്നു ചോദിച്ച്‌ ശീലമില്ല.

ഗുഡ്‌വില്‍ നാലുതരമുണ്ട്‌. അതറിയുന്നതോടെ അതിന്റെ വിലയും മനസ്സിലാകും.

1. ഡോഗ്‌ ഗുഡ്‌വില്‍
കുട്ടന്‍പിള്ള മരിക്കുംവരെ ഞാന്‍ നാട്ടില്‍ പോകുമ്പോഴെല്ലാം അയാളുടെ ചായക്കടയില്‍ കയറും. മൂപ്പര്‍ വിശേഷങ്ങളെല്ലാം തിരക്കും ഞാന്‍ ചായ കുടിക്കും. മെലിഞ്ഞു/തടിച്ചു/വെളുത്തു/കറുത്തു എന്നിങ്ങനെ എന്നെ അംഗപ്രത്യംഗം അളന്ന് അഭിപ്രായവും പറയും. ഇങ്ങനെ ഒരു ലോയല്‍ കസ്റ്റമര്‍ ബേസാണ്‌ കുട്ടന്‍പിള്ളയുടെ കടയുടെ ഗുട്ടന്‍പിള്ള. മൂപ്പര്‍ മരിച്ചു. വേരൊരാള്‍ കട വാങ്ങി. നാലു ഉണ്ണിയപ്പവും കേക്കും നിരത്തി ഈച്ചയടിക്കുന്നു. ഞാനും കയറാറില്ല, തൊട്ടടുത്ത്‌ എന്റെ വീടുള്ളപ്പോ എന്തിനാ കടയിലെ ചായ?

ഇതാണു ഡോഗ്‌ ഗുഡ്‌വില്‍. കുട്ടന്‍പിള്ള എന്ന വ്യക്തിയിലാണു കസ്റ്റമര്‍ക്ക്‌ ലോയല്‍റ്റി. പട്ടിക്ക്‌ അതിന്റെ യജമാനനോടുള്ള സ്നേഹം പോലെ അത്‌ വ്യക്തിയിലാണ്‌. ആ സ്നേഹം കണ്ട്‌ നമ്മള്‍ പോയി ആ പട്ടിയെ വാങ്ങിയാലോ? കാര്യമില്ല. അതിന്റെ സ്നേഹം ട്രാന്‍സ്ഫറബിള്‍ അല്ല. ഒന്നേന്നടിച്ച്‌ അതിനെ നമ്മളും തിരിച്ചും സ്നേഹിച്ചു തുടങ്ങണം.

2. ക്യാറ്റ്‌ ഗുഡ്‌വില്‍
കൊല്ലം കുമാര്‍ തീയറ്റര്‍ ഒരു പഴഞ്ചനാണ്‌ എങ്കിലും തിരക്കിനു കുറവില്ല. കണ്ണായ സ്ഥലത്തല്ലേ. കൊല്ലം റെയില്‍വേ ക്യാന്റീനില്‍ ഇരിക്കാന്‍ പോലും ഇടമില്ല, ചോറിനു പകരം പഞ്ചാമൃതം കൊടുക്കുന്നതുകൊണ്ടാണോ? കുമാര്‍ തീയറ്റര്‍ എസ്‌ കെ രാധാകൃഷ്ണന്‍ വിറ്റു, അചാണി രവി വാങ്ങി
എന്നതൊന്നും ആ ഗൂഡ്‌വില്ലിനെ ബാധിക്കുന്നില്ല. പൂച്ചക്ക്‌ ഒരു വ്യക്തിയോടല്ല, അത്‌ താമസിക്കുന്ന വീടിനോടാണ്‌ അടുപ്പം. അതിപ്പോ ആര്‍ ആ വീട്ടില്‍ താമസിച്ചാലും പൂച്ചക്ക്‌ വലിയൊരു പ്രശ്നമല്ല.

3. റാറ്റ്‌ ഗുഡ്‌വില്‍
ഞാന് ‍ഇന്ത്യയില്‍ സിഗററ്റ്‌ വലിച്ചിരുന്ന കാലം മുഴുവന്‍ "വിത്സ്‌" ആണു വലിച്ചത്‌. അതു കിട്ടാനില്ലെങ്കില്‍ ഉള്ള കട തിരക്കി പോകും. വിദ്യ "നെന്മണി" അരി മാത്രമേ വീട്ടില്‍ വാങ്ങൂ. പക്ഷേ അവര്‍ അരിക്കു പുറമേ മോട്ടോര്‍ ബൈക്ക്‌ ഇറക്കിയാലോ? വിദ്യ വാങ്ങിക്കുമോ?

രാമന്റേയൊ അബ്ദുള്ളയുടേതോ പറമ്പില്‍ നിന്നും പിഴുതതാവട്ടേ, മൈതാനത്തോ മച്ചുമ്പുറത്തോ കൊണ്ടിട്ടതാവട്ടെ, കപ്പയാണോ, പെരിച്ചാഴി തിരക്കി വരും. അവനു ആ പ്രോഡക്റ്റില്‍ മാത്രമാണു ലോയല്‍റ്റി. റാറ്റ്‌ ഗുഡ്‌വില്ലിന്റെ കളി അത്രേയുള്ളു. ബ്രാന്‍ഡ്‌ നെയിമിന്റെ വിലയാണ്‌ ഇതിന്റെ വില.

4. റാബിറ്റ്‌ ഗുഡ്‌വില്‍‍
മുയല്‍ക്കുട്ടന്‌ ഇതൊന്നും ഒരു പ്രശ്നമേയല്ല. എവിടെകൊണ്ട്‌‌ വളര്‍ത്തിയാലും അവന്‍ വളര്‍ന്നോളും. റ്റാറ്റാ ഉപ്പ്‌, റ്റാറ്റാ മണ്‍വെട്ടി, റ്റാറ്റാ തേയില, റ്റാറ്റാ സഫാരി, റ്റാറ്റാ സ്റ്റ്രക്ചറല്‍ സ്റ്റീല്‍. ആ പേരു കണ്ടാല്‍ എന്തൊരു വിശ്വാസമാ. "പ്രകൃതിയുടെ മിശ്രിതം റ്റാറ്റായുടെ പാക്കിങ്ങും" എന്നു കേള്‍ക്കുമ്പോ പൊന്നുംകുടത്തിനു പൊട്ടും എന്നു നമുക്കു തോന്നുന്നില്ലേ.

ഇവനാണു വിലയെങ്കില്‍ വില. പൊന്മുട്ടയിടുന്ന താറാവല്ലേ, ചാകാതെ മാത്രം നോക്കിയാല്‍ മതി, എന്തും വില്‍ക്കാം എന്തു കണ്‍സള്‍റ്റന്‍സിയും സര്‍വീസും നടത്താം. ഇതിനു വില കണക്കുകൂട്ടാറില്ല, വിലപേശി ഉറപ്പിക്കാനേ കഴിയൂ..

ദേ ബെല്ലടിച്ചല്ലോ.

വരയാട്

2006-07-14T13:59:00.000-07:00

മൂന്നാറില്‍ വൈകുന്നേരത്തെ ചായസമയത്ത്‌ മഴ പെട്ടെന്ന് നിന്ന് ചെറുചൂടുള്ള വെയില്‍ തെളിഞ്ഞു. വരയാടുകളെ കാണാന്‍ പറ്റിയ സമയം. 15 കിലോമീറ്റര്‍ മറയൂര്‍ ഭാഗത്തേക്ക്‌ സഞ്ചരിച്ച്‌ ഇരവികുളം വന്യജീവിസംരക്ഷണകേന്ദ്രത്തിലെ പൊതുജനത്തിനു സന്ദര്‍ശനാനുമതിയുള്ള ‌രാജമലയില്‍ ചെന്നെത്തി. സജിച്ചേട്ടന്റെ പരിചയക്കാര്‍ ഡ്യൂട്ടിയിലുണ്ടായിരുന്നതിനാല്‍സുരക്ഷാപ്രശ്നങ്ങളാല്‍ വാഹനങ്ങളെ കടത്തിവിടാത്ത മലമ്പാതകളും ഞങ്ങള്‍ക്ക് തുറന്നു കിട്ടിയതിനാല്‍ ആടുകള്‍ക്കടുത്തുവരെ കാറില്‍ പോകാനായി.

നീല്‍ഗിരി താര്‍ hemitragus hylocrius എന്ന വരയാട്‌ ചെമ്മരിയാടിനോട്‌ വളരെ അടുത്ത ബന്ധമുള്ള മലയാട്‌ (tahr കുലത്തിലെ മൂന്നു വംശങ്ങളില്‍ ഒന്നാണ്‌. ഹിമാലയന്‍ മലയാട്‌ (hemitragus jemlahicus) അറേബ്യന്‍ മലയാട്‌ (hemitragus jayakari) എന്നിവയാണ്‌ tahr ജനുസ്സിലെ മറ്റു സ്പീഷീസ്‌.

പറ്റമായി വെയില്‍ കായുന്ന വരയാടുകളെ കണ്ടപ്പോള്‍ ഇഗ്നീഷന്‍ ഓഫ്‌ ചെയ്ത്‌ അവയ്ക്ക്‌ ശല്യമാകാത്ത കാഴ്ചക്കാരായി ഞങ്ങള്‍. "ഇവയ്ക്കെല്ലാം ചാരനിറം മൂടിയ തോലല്ലേ, വരയൊന്നുമില്ലല്ലോ. പിന്നെ വരയാട്‌ എന്ന പേരെങ്ങനെ വന്നു ഈ ജീവിക്ക്‌?" ഞാന്‍ അന്വേഷിച്ചു.

"വരൈ എന്നാല്‍ തമിഴില്‍ പാറക്കെട്ട്‌ എന്നാണര്‍ത്ഥം. ഇവറ്റ കുത്തനെയുള്ള പാറക്കെട്ടുകള്‍ക്ക്‌ മുകളിലാണു വാസം. വലിയ പാറകള്‍ക്ക്‌ മുകളിലൂടെ മിന്നല്‍ വേഗത്തില്‍ പാഞ്ഞുകളിക്കുന്ന ഇവയെ പാറക്കെട്ടിലെ ആട്‌ എന്ന അര്‍ത്ഥത്തിലാണ്‌ വരൈ ആടെന്നു വിളിക്കുന്നത്‌, വരയുള്ള ആടെന്നല്ല" സജിച്ചേട്ടന്‍ പറഞ്ഞു.

പശ്ചിമഘട്ടത്തിലെ പുല്ലു നിറഞ്ഞ പാറച്ചെരുവുകളില്‍ മാത്രമേ ലോകത്ത്‌ വരയാടുകളുള്ളു. (തിരുവനന്തപുരം സൂവിലും അമേരിക്കയിലെ രണ്ടു സൂവിലും വരയാടുകളെ അടച്ചു വളര്‍ത്തുന്നുണ്ടെന്ന് താര്‍ ഫൌണ്ടേഷന്‍ സൈറ്റില്‍ http://www.tahrfoundation.org വായിച്ചു. അതു കണക്കില്‍ പെടില്ലല്ലോ) രണ്ടായിരത്തോളം ആടുകളേ അവശേഷിച്ചിട്ടുള്ളു. അവയില്‍ മിക്കവയും ഇരവികുളം വൈല്‍ഡ്‌ ലൈഫ്‌ പാര്‍ക്കിലാണ്‌. നീലഗിരിയിലെ ഈ മലയാടുളും ഹിമാലയത്തിലേതും അറേബ്യയിലേയും തന്റെ ബന്ധുക്കളെപ്പോലെ വേട്ടക്കാരുടെയും കുടിയേറ്റക്കാരുടെയും ക്രൂരതക്കു മുന്നില്‍ കുലം നശിച്ച സാധുക്കളാണ്‌. ഇരുനൂറു വര്‍ഷം മുന്‍പ്‌ കേരളത്തിന്റെ 75% ഉം വനഭൂമിയായിരുന്നു. ഇന്നത്‌ നാലിലൊന്നായി ചുരുങ്ങി. വരയാടിന്റെ വരൈകള്‍, ഈ ലോകത്തെ എല്ലാം ഭോഗിച്ച്‌ ഇല്ലാതാക്കുന്ന രാക്ഷസര്‍- മനുഷ്യര്‍-കയ്യാളിയപ്പോള്‍ ലക്ഷങ്ങളുടെ അംഗബലം ഉണ്ടായിരുന്ന അവന്റെ കുലം മുടിഞ്ഞു. ഇറച്ചിക്കും പിന്നെ വെറും വിനോദത്തിനും വന്‍ തോതില്‍ അവ നായാടപ്പെട്ടപ്പോള്‍ വംശം അന്യം നിന്നുപോകാറാകുകയും ചെയ്തു.

മലയിറങ്ങാന്‍ നേരം വരയാട്ടില്‍പറ്റം എഴുന്നേറ്റു നിന്ന് ഞങ്ങളെ യാത്രയാക്കി. കാറ് സ്റ്റാര്‍ട്ടാകുന്ന ഇരമ്പം കേട്ട് രണ്ട് ആട്ടിന്‍‌കുട്ടികള്‍ തുള്ളിക്കളിക്കലുപേക്ഷിച്ച് അമ്മയുടെ നേര്‍ക്ക് ഓടി.

ബിയാവക്‌ രാക്ഷസാ*

2006-07-11T01:40:00.000-07:00

ഒന്നു ക്ലിക്കി വലിയ ഫോട്ടോ കാണൂ ഇല്ലെങ്കില്‍ ഇവനെ ശരിക്കറിയാന്‍ കഴിയില്ല. ഇവന്‍ കൊമോഡോ ഡ്രാഗണ്‍ varanus komodoensis.

ഈ പിശാചാണെന്നു കരുതിയാണ്‌ ഏവൂരാന്‍ ഉടുമ്പിനെ കണ്ടു വിരണ്ടത്‌. ഇന്നു ഭൂമുഖത്തുള്ളവരില്‍ ഏറ്റവും വലിയ പല്ലിയാണ്‌ കൊമോഡോ വ്യാളി. ഇന്തോനേഷ്യയിലെ കൊമൊഡോയിലും പരിസരത്തുള്ള മറ്റ്‌ ആള്‍താമസമില്ലാത്ത ദ്വീപുകളിലും മാത്രം കാണപ്പെടുന്ന ഇവയില്‍ മൂന്നേകാല്‍ മീറ്റര്‍ വരെ നീടലും നൂറ്ററുപത്താറു കിലോ വരെ തൂക്കവുമുള്ള ഒന്നാണു കണ്ടിട്ടുള്ളതില്‍ വച്ച്‌ ഏറ്റവും വലുതെന്ന് സയന്റിഫിക്‌ അമേരിക്കന്‍ മാഗസിന്‍ പറയുന്നു.

ഏഴുമാസം കാത്തു വച്ചാണു ഡ്രാഗത്തി കുഞ്ഞിനെ വിരിക്കുന്നതെന്നും ഡ്രാഗര്‍ ഒരു നായയുടെ വേഗത്തിലോടുമെന്നും മനുഷ്യനെ തരത്തിനു കിട്ടിയാല്‍ അപ്പോള്‍ തട്ടുമെന്നും വിക്കി തരുന്ന വിവരം

പഴകി അളിഞ്ഞ മാംസം തിന്നുന്നതും കോന്ത്രമ്പല്ലിന്റെ ഇടയില്‍ മാംസം ഇരുന്നു ചീയുന്നതും ഇവറ്റയുടെ വായിലെ സെപ്റ്റിക്ക്‌ ബാക്റ്റീരിയ കൃഷിക്ക്‌ കാരണമാകുന്നെന്ന് ദില്‍ബാസുരന്റെ റിപ്പോര്‍ട്ട്‌. (പോലീസുകാരന്റെ തൊപ്പിയെ തോല്‍പ്പിക്കാന്‍ പോന്ന ഈ മുടിഞ്ഞവന്റെ ഒടുക്കത്തെ വായ്‌ നാറ്റം ആയിരിക്കും ഡ്രാഗണ്‍ ബ്രീത്ത്‌ എന്നു പറയുന്നത്‌)

സീയാറ്റില്‍ സൂവില്‍ മൂപ്പര്‍ സൂപ്പെര്‍സ്റ്റാര്‍ ആണെന്ന് അവിടത്തെ പ്രതിനിധി സന്തോഷ്‌ റിപ്പോര്‍ട്ട്‌ ചെയ്യുന്നു.

[ഇത്‌ വായനക്കാരാല്‍ നിര്‍മ്മിതമായ ഒരു പോസ്റ്റ്‌. ചിത്രമൊഴികെ
എല്ലാത്തിനു ക്രെഡിറ്റ്‌ മുകളിലത്തെ പോസ്റ്റില്‍ കമന്റ്‌ ഇട്ടവര്‍ക്കും, വിക്കിക്കും സയന്‍സ്‌ മാഗിനും. *biawak rakshasa is the indonesian name for komodo dragon, literally meaning demon lizard]

കടുംപിടുത്തക്കാരന്‍

2006-07-09T23:52:00.000-07:00

പത്തു വര്‍ഷം മുന്‍പ്‌ ആന്ധ്രയിലൊരു കമ്പനിയില്‍ താമസിച്ചു ജോലി ചെയ്യുന്ന ദിവസങ്ങളിലൊന്നില്‍ ഒരു സെക്യൂരിറ്റി ഗാര്‍ഡ്‌ ആഹ്ലാദത്തോടെ താനൊരു ഗോഥയെ കെണിയില്‍ പെടുത്തി തല്ലികൊന്നെന്ന് അറിയിച്ചു. അതു കഴിച്ചാല്‍ എല്ലാ അസുഖവും ശമിക്കുമെന്ന് ഒരു പ്രലോഭനം സഹിതം നന്ദ്യാലാ അരി കൊണ്ടുണ്ടാക്കിയ ഊണിനൊരു ക്ഷണവും നടത്തി. ഗോഥാ എന്താണെന്നറിയില്ലാത്തതുകൊണ്ട്‌ ശവം വീണ സ്ഥലം വരെ പോയി നോക്കി. വീണിതല്ലോ കിടക്കുന്നു ധരണിയില്‍ ഗോയ്‌ഥേ. ആളെപ്പിടി കിട്ടി- നമ്മുടെ ഉടുമ്പ്‌ (common indian monitor lizard bn. varanus bengalensis)

ഉടുമ്പിന്റെ ഇറച്ചി ചതച്ചു തിന്നാല്‍ മസില്‍ വേദന ശമിക്കുമെന്നും ചാട്ട പോലെ നീണ്ട നാക്ക്‌ കഴിച്ചാല്‍ അടിയും ഇടിയും കൊണ്ട ചതവും മറ്റും മാറുമെന്നും ഇന്ത്യയിലാകെ വിശ്വസിക്കപ്പെടുന്നു. ഇതില്‍ കഴമ്പുണ്ടെന്നും ഇല്ലെന്നും ആയുര്‍വേദികളായ പലരും പറയുന്നു. എന്തായാലും ഉടുമ്പ്‌ ഇന്നു അന്യം നില്‍ക്കുകയാണ്‌- കഴിവതും അവനെ വെറുതേ വിടാം.

ഏതോ മറാത്താ പോരാളി മുതല്‍ കായം കുളം കൊച്ചുണ്ണി വരെ ഉടുമ്പിനെ കയറില്‍ കെട്ടി കയറ്റി വിട്ട്‌ അതില്‍ തൂങ്ങി കോട്ടമതിലുകള്‍ കടന്നിട്ടുണ്ടെന്ന് ഐതിഹ്യങ്ങളുണ്ട്‌. ഉടുമ്പിന്റെ അള്ളിപ്പിടുത്തത്തിനു ഒരാളെ താങ്ങാനുള്ള കെല്‍പ്പുള്ളതുകൊണ്ട്‌ വിശ്വസിക്കാവുന്നതേയുള്ളു.

ഗഞ്ചിറ എന്ന വാദ്യോപകരണം ഉണ്ടാക്കാന്‍ ഉടുമ്പിന്‍ തോല്‌ ഉപയോഗിച്ചു വരുന്നു. എന്നാലത്‌ നിയമവിരുദ്ധമാണ്‌. അടുത്തസമയത്ത്‌ കൊല്ലം മവേലിക്കര എന്നീ സ്ഥലങ്ങളില്‍ നിന്നും ആയിരത്തോളം ഗഞ്ചിറകള്‍ ഫോറസ്റ്റ് കണ്‍സര്‍വേറ്റര്‍ പിടിച്ചെടുത്ത്‌ കേസ്‌ ചാര്‍ജ്ജ്‌ ചെയ്തിരുന്നു.

കാരുടുമ്പ്‌ പൊന്നുടുമ്പ്‌ എന്നു രണ്ടിനമുണ്ട്‌. വലിപ്പവും കറുത്ത നിറവും ഉള്ള
കാരുടുമ്പിനാണത്രേ ഗുണവും കൂടുതല്‍. ചിത്രത്തില്‍ കാണുന്നത്‌ കാരുടുമ്പ്‌ ഇനമാണ്‌. പൊന്നുടുമ്പിനെയാണ്‌ കൂടുതലായും കണ്ടു വരുന്നത്‌.

മോണിട്ടര്‍ എന്ന പേര്‍ ഇത്തരം പല്ലികള്‍ക്ക്‌ കിട്ടിയത്‌ മുതലയുള്ള സ്ഥലങ്ങളില്‍ ഇവന്‍ അപായനിരീക്ഷകനായി കാണപ്പെടും എന്ന വിശ്വാസമുള്ളതുകോണ്ടാണ്‌.(മുതല മുട്ട ഉടുമ്പിന്റെ ഏറ്റവും ഇഷ്ട ഭോജ്യങ്ങളില്‍ ഒന്നാണെന്നതിനാല്‍ ഇത്‌ മുതലമടകള്‍ തിരഞ്ഞു കണ്ടുപിടിക്കും)

ഉടുമ്പ്‌ എന്ന പേരില്‍ ഒരു ഗുസ്തിക്കാരനില്ലാത്ത ഒരു നാടും കേരളത്തിലും തമിഴു നാട്ടിലും കാണില്ല, ഉടുമ്പിന്‍പിടി അത്ര കേമമാണ്‌.

ഭക്ഷണവും മരുന്നുമായും തുകലിനു വേണ്ടിയും ഉടുമ്പുകളെ ഉപയോഗിക്കുന്നത്‌ നിരോധിച്ചിരിക്കുകയാണ്‌ .

മുതലമുട്ടകള്‍, ചെറു ചീങ്കണ്ണികള്‍, പാമ്പ്‌, എലി, തേള്‍ തുടങ്ങിയ ജീവികളെ പിടിച്ചു തിന്ന് നാട്ടിന്‍പുറങ്ങള്‍ സുരക്ഷിതവും വാസയോഗ്യവുമാക്കുക എന്ന നിയോഗമാണ്‌ ഉടുമ്പുകളുടേത്‌ . എന്നാല്‍ കോഴിമുട്ടയും കോഴിക്കുഞ്ഞുങ്ങളും ചിലപ്പോഴൊക്കെ ഉടുമ്പിന്റെ തീറ്റയാകാറുണ്ട്‌. പോളിത്തീന്‍ കവറുകള്‍ വഴിയില്‍ ഉപേക്ഷിക്കുന്ന കാലം സംജാതമായതോടെ ഇറച്ചി-മീന്‍ മണമുള്ള കവറുകള്‍ തിന്ന് ഉടുമ്പുകള്‍ വളരെയേറെ അംഗബലം കുറഞ്ഞ ജന്തുവര്‍ഗ്ഗമായി.

ഉടുമ്പിനെ നായയെപ്പോലെ ഇണക്കി വളര്‍ത്താം. കോഴിമുട്ടയും മീന്‍-ഇറച്ചി കഷണങ്ങളും കൊടുത്താല്‍ മതിയാവും. കൊമൊഡോ
ഡ്രാഗണ്‍ എന്ന ആള്‍പ്പിടിയന്‍ പല്ലി ഉടുമ്പിന്റെ മൂത്ത ഒരേട്ടനാണ്‌. ആളൊഴിഞ്ഞമൂലയിലെ പാറപ്പുറത്ത്‌ നാക്കു പുറത്തേക്കിട്ടു ചുഴറ്റി ചെറു വെയില്‍ കൊണ്ടിരിക്കുന്ന്ന ഉടുമ്പ്‌ ഇന്ന് അപൂര്‍വമായ ഒരു കാഴ്ച്ചയായി.

[വിട്ടുപോയ വിവരങ്ങള്‍ കൂട്ടിച്ചേര്‍ത്ത കുറുമാനും അക്ഷരപ്പിശാചിനെ ഉച്ചാടനം ചെയ്ത ശനിയനും നന്ദി]

ബുദ്ധന്റെ ഉടവാള്‍ സൂക്ഷിപ്പുകാര്‍

2006-07-09T00:59:00.000-07:00

ക്രി. വ അഞ്ഞൂറോടടുത്ത്‌ ബോധിധര്‍മ്മന്‍ (തമോ എന്ന് മന്‍ഡറിന്‍ പേര്‍)പേര്‍ഷ്യന്‍* ബുദ്ധഭിക്ഷു ജാപ്പനീസില്‍ സെന്‍ എന്നറിയപ്പെടുന്ന ധ്യാന്‍ രീതിയിലുള്ള മഹായാന ബുദ്ധമതം പ്രചരിപ്പിക്കാന്‍ ഹേനന്‍ നഗരത്തിലെത്തിയെന്നും അവിടെനിന്നും സഞ്ചരിച്ച്‌ ഷാവൊലിന്‍ (യുവ വനങ്ങള്‍ എന്ന് വാഗര്‍ത്ഥം) എന്നറിയപ്പെട്ടിരുന്ന ബുദ്ധവിഹാരത്തിനടുത്ത്‌ ധ്യാനിക്കവേ വിഹാരത്തിലുണ്ടായിരുന്ന ഭിക്ഷുക്കള്‍ ആ ശക്തി മനസ്സിലാക്കി അദ്ദേഹത്തെ നായകനാക്കിയെന്നും ഷാവൊലിന്‍ ചരിതങ്ങള്‍ പറയുന്നു.ബുദ്ധഭിക്ഷുക്കള്‍ വ്യായാമവും ഭക്ഷണവുമില്ലാതെ അശക്തരായിരിക്കുന്നത്‌ നിര്‍വ്വാണത്തിനൊരു തടസ്സമാവുമെന്ന് കണ്ട ബോധിധര്‍മ്മന്‍ ഹഠയോഗാധിഷ്ടിഠമായ ചിട്ടയില്‍ ജന്തുക്കളുടെ ചലനങ്ങള്‍ക്കനുസരിച്ച്‌ യോഗ മുദ്രകള്‍ വ്യായാമവുമാക്കി അതില്‍ നിലവിലുണ്ടായിരുന്ന ചൈനീസ്‌ പയറ്റുമുറകള്‍ വിളക്കിച്ചേര്‍ത്ത്‌ ഷാവൊലിന്‍ അഭ്യാസരീതിയെ ക്രോഡീകരിച്ചു.

ആയിരത്തോളം വര്‍ഷം യോഗചര്യയിലൂന്നിയ ഈ മുറകള്‍ ജംഖിസ്‌ ഖാന്റെ ആക്രമണകാലത്ത്‌ പെട്ടന്ന് ആയോധനകലയായ ഷാവൊലിന്‍ ക്വാന്‍ ആയി രൂപം മാറുകയായിരുന്നു. മംഗോള്‍ സാമ്ര്യാജ്യo നിലം പതിച്ച ശേഷം മിംഗ്‌ സാമ്രാജ്യം സ്ഥാപിച്ചത്‌ യുന്‍ ചാങ്ങ്‌ എന്ന സെന്‍ സന്യാസിയായിരുന്നു. ഈ വംശം ഭരിച്ച സമയത്ത്‌ ഷാവോലിന്‍ വിഹാരം ഏറ്റവും വലിയ വളര്‍ച്ചയും കണ്ടു.

ഷാവോലിന്‍ പയറ്റു വിദ്യ
ഇന്നു കാണുന്ന 170 തരം മുഷ്ടിതന്ത്രവും 130 ആയുധപ്പയറ്റു വിദ്യയും അടങ്ങുന്ന 300 ഇന ആയോധനാതന്ത്രത്തില്‍
പയറ്റുവാള്
‍ത്രിശൂലം
ഇരുതലവാള്‍ തുടങ്ങി 5 തരം വാളുകള്‍
ദണ്ഡ്‌
നാരായക്കത്തി
വാക്കിംഗ്‌ സ്റ്റിക്ക്‌
പൈപ്പ്‌ ഡാര്‍ട്ട്‌
അള്ളേറ്‌
അരിവാള്‍
കുന്തം
വാള്‍ക്കുന്തം
ആണിച്ചാട്ട
വെണ്മഴുഎന്നിങ്ങനെ പതിനെട്ടു തരം ആയുധങ്ങളും
പതിനെട്ടു മൃഗങ്ങളെ (പ്രധാനമായും കൊറ്റി, പുലി, ഡ്രാഗണ്‍, പാമ്പ്‌, കടുവ, കുതിര, കുരങ്ങ്‌, മാന്‍, കരടി, പക്ഷി, ) അനുകരിക്കുന്ന ചലനങ്ങളും
പതിനെട്ടു പയറ്റു നിലകളും
മുപ്പത്താറ്‌ അടവുകളും അടങ്ങുന്നു.
എഴുപത്തിരണ്ട്‌ പരിശീലന രീതികളാലെയാണ്‌ ഷാവൊലിന്‍ ക്വാന്‍ പരിശീലിപ്പിക്കുന്നത്‌. ഇതില്‍ മിക്കതും അതി കഠിനവും ദശാബ്ദങ്ങളോളം പരിശീലിച്ചാല്‍ മാത്രം സിദ്ധമാകുന്നതുമാണ്‌.

മൂന്നു പതനങ്ങള്‍
രണ്ടായിരം വര്‍ഷത്തെ ചരിത്രത്തില്‍ മൂന്നു തവണ കലാപകാരികളോട്‌ തോറ്റ്‌ ഷാവോലിന്‍ വിഹാരം നിശ്ശേഷം കീഴടങ്ങിയിട്ടുണ്ട്‌. ഓരോതവണയും ഒടുങ്ങിയതിനെക്കാള്‍ വേഗത്തില്‍ അതില്‍ സന്യാസികള്‍ പുനപ്രവേശവും നടത്തി. ഔദ്യോഗിക ചരിത്രം ഇന്ന് ചുവര്‍ ചിത്രങ്ങളിലും നാശകോശമായ രേഖകളിലും ഒതുങ്ങിയതിന്റെ കാരണം അതാണ്‌.

നാശവും പുനരുദ്ധാരണവും
കമ്യൂണിസ്റ്റ്‌ റെവല്യൂഷന്‍ കാലത്ത്‌ മതം സന്യാസം എന്നിവ ഭോഷ്കായും ആയൊധന പരിശീലനം സര്‍ക്കാരുകളോടുള്ള വെല്ലുവിളിയായും കാണപ്പെട്ടതിനാല്‍ 13000 എക്കര്‍ വിസ്റ്റീര്‍ണ്ണമുള്ള ഷാവോലിന്‍ വിഹാര പരിസരം വിപ്ലവകാരികള്‍ കയ്യേറി പൊതുമുതലാക്കുകയും പുറപ്പെടാ ധ്യാനികളൊഴിയെ മിക്കവാറും എല്ലാ സന്യാസികളും വിഹാരമൊഴിയുകയും ചെയ്തു. വിലപ്പെട്ട ഷാവൊലിന്‍ പുസ്തകശാല ഇതില്‍ നശിപ്പിക്കപ്പെട്ടു പോയി.നാല്‍പ്പതു വര്‍ഷത്തിനു ശേഷം ഷാവൊലിന്‍ റ്റെമ്പിള്‍, 36ത്‌ ചേമ്പര്‍ ഓഫ്‌ ഷാവൊലിന്‍, മാഡ്‌ മങ്കി കുങ്ങ്‌ ഫൂ, സ്നേക്‌ ഇന്‍ ദ മങ്കീസ്‌ ഷാഡോ എന്നിങ്ങ (മുഖ്യമായും ജെറ്റ്‌ ലീ ചിത്രങ്ങള്‍) ഷാവോലിനു ലോക ശ്രദ്ധ നേടിക്കൊടുത്ത ശേഷമാണ്‌ കമ്യൂണിസ്റ്റ്‌ ചൈനീസ്‌ സര്‍ക്കാരിനു തങ്ങള്‍ക്കു നഷ്ടമായ അമൂല്യ നിധിയെ തിരിച്ചറിയാനായത്‌. ഇതെ തുടര്‍ന്ന് പലായനം ചെയ്ത സന്യാസിമാരില്‍ ജീവിച്ചിരിക്കുന്നവരെ തിരിച്ച്‌ വിഹാരത്തിലെത്തിക്കുകയും നാല്‍പ്പതു വര്‍ഷം മുന്‍പ്‌ നശിപ്പിച്ച ഗ്രന്ധങ്ങളില്‍ ഒട്ടു മുക്കാലും ഈ ഭിക്ഷുക്കളുടെ ഓര്‍മ്മയില്‍ നിന്നും വീണ്ടും എഴുതിയെടുക്കുകയും ചെയ്തു. ഇന്നത്തെ ഷാവൊലിന്‍ റ്റെമ്പിളിനു മിംഗ്‌ കാലത്തില്‍ നിന്നും പല വലിയ വത്യാസങ്ങളുമ്മുണ്ട്‌. ടിക്കറ്റെടുത്ത്‌ സന്ദര്‍ശിക്കാവുന്ന ഒരു ടൂറിസ്റ്റ്‌ കേന്ദ്രവും, പാശ്ചാത്യരീതിയില്‍ മാനേജ്‌മന്റ്‌ ബിരുദങ്ങള്‍ കൂടി കൈവശമുള്ള എക്സിക്യൂട്ടീവ്‌ സന്യാസിമാരുടെ ഭരണവും ഇതിനെല്ലാം നടുവില്‍ ധ്യാനവും അഭ്യാസവുമൊക്കെയായി ഏറെക്കുറെ ഒരു തിരക്കു പിടിച്ച കേന്ദ്രമായിരിക്കുന്നു ആധുനിക ഷാവോലിന്‍ വിഹാരം. ഇങ്ങനെ ഇതൊരു university style ബുദ്ധവിഹാരമായി മാറ്റേണ്ടതുണ്ടോ എന്ന ചോദ്യത്തിനു ഷാവോലിന്‍ എല്ലാക്കാലത്തും അതിശയകരമായിരുന്ന വത്യസ്തത പുലര്‍ത്തിയിരുന്നിട്ടില്ലേ എന്നാണത്രേ ഭാരവാഹികളുടേ മറുചോദ്യം.

* he is either persian or south indian as per wikipedia, which is not in accordance with official web page of shaolin temple
[ലേഖനത്തിനാധാരം
1. 2004ഇല്‍ നാഷണള്‍ ജ്യോഗ്രഫിക്‌ ചാനല്‍ ഷാവോലിന്‍ വിഹാരത്തിലെ ലൈബ്രറി പുന്ര്നിര്‍മ്മാണത്തെക്കുറിച്ചും തുടര്‍ന്ന് 72 പഠനരീതികളെക്കുറിച്ചും പുറത്തിറക്കിയ പരമ്പര

2. ഷാവോലിന്‍ വിഹാരത്തിന്റെ ഔദ്യോഗിക വെബ്‌ പേജ്‌
3. http://www.kungfulibrary.com/
4. ഷാവോലിന്‍ റ്റെമ്പിള്‍ എന്ന ചലചിത്രം]

ഉള്‍ട്ടാപ്പുള്‍ട്ടാ

2006-07-04T23:21:00.000-07:00

ചിത്രത്തില്‍ കാണുന്നത്‌ കടവാതില്‍ (flying fox) എന്ന ലോകത്തിലെ ഏറ്റവും വലിയ ഇനം വവ്വാല്‍.
കഴിഞ്ഞ പോസ്റ്റ്‌ വായിച്ച ഒരാള്‍ വവ്വാലെന്തിനു തല കീഴായി കിടക്കുന്നു എന്നു ചോദിച്ചിരുന്നു. സാധാരണ പറക്കുന്ന ജീവികള്‍ തല മുകളറ്റം വരുന്ന രീതിയിലും, നാല്‍ക്കാലികളും ഇഴജന്തുക്കളും തല മുന്‍വശത്തേക്കു നീട്ടിയുമാണല്ലോ വിശ്രമിക്കാറ്‌. വവ്വാലിന്റെ ചിറകുകള്‍ ചര്‍മ്മനിര്‍മ്മിതമാകയാലും കാലുകള്‍ക്ക്‌ പക്ഷികളെ പോലെ റ്റേക്‌ ഓഫ്‌ ചെയ്യിക്കാന്‍ ത്രാണിയില്ലാത്തതിനാലും ഹാങ്ങ്‌ ഗ്ലൈഡര്‍ പോലെ ലൌഞ്ച്‌ ചെയ്യുകയേ നിവര്‍ത്തിയുള്ളു. എറ്റവും എളുപ്പം പറന്നു തുടങ്ങാന്‍ തലകീഴായി കിടക്കുകയാണ്‌ വെറുതേ പിടി വിട്ട്‌ കുട തുറന്ന് പറന്നു തുടങ്ങുകയാണല്ലോ. പകല്‍ ഉറക്കക്കാരനാകയാല്‍ മറ്റു ജന്തുക്കള്‍ സഞ്ചരിക്കാനിടയില്ലാത്ത അടിഭാങ്ങളിലും മറ്റും തൂങ്ങിക്കിടന്നാല്‍ അപായഭീഷണി കുറയുമെന്നത്‌ രണ്ടാമത്തെ കാരണം.

അപ്പോള്‍ തേവാങ്ക്‌ പറക്കില്ലല്ലോ, പിന്നെന്തിനു വാവലിനെ പോലെ കിടക്കുന്നു?

തേവാങ്ക്‌ വാവലിനെപ്പോലെ തക കിഴുക്കായിട്ടല്ല, മരക്കൊമ്പില്‍ നാലു കാലുകൊണ്ടും കെട്ടിപ്പിടിച്ച്‌ തൂങ്ങിക്കിടക്കുകയാണ്‌ ചെയ്യുന്നത്‌. ദിവസത്തില്‍ പത്തു പതിനെട്ടു മണിക്കൂര്‍ ഉറങ്ങിക്കളയുന്ന, മിനുട്ടില്‍ അഞ്ചാറടി മാത്രം വേഗതയുള്ള പേശീ ശക്തി വളരെ കുറഞ്ഞ തേവാങ്കിന്‌ മരത്തില്‍ കിടക്കാനും സഞ്ചരിക്കാനും ഏറ്റവും കുറവ്‌ ആയാസമുള്ള രീതി തൂങ്ങിക്കിടക്കല്‍ തന്നെ.
പേശികളുടെയും എല്ലുകളുടെയും പ്രത്യേകതയാല്‍ സഞ്ചാരികള്‍ വടിമേല്‍ കെട്ടിയിടുന്ന തുണിപ്പൊഴി പോലെ സുഖമായി ഇവന്‍ തൂങ്ങി കിടന്നോളും ഒട്ടും ആയാസമില്ലാതെ തന്നെ. ഓടി രക്ഷപ്പെടാന്‍ കഴിവില്ലത്ത ഇവന്റെ രക്ഷാ തന്ത്രം ഒളിച്ചു കിടക്കല്‍ ആണെന്നതിനാല്‍ ഒരിലക്കൂട്ടമോ തേനീച്ചക്കൂടോ പോലെ തൂങ്ങിക്കിടക്കല്‍ ജന്തു സഞ്ചാരമുള്ള ഇടങ്ങള്‍ ഒഴിവാക്കാനും ഇരതേടുന്ന മൃഗങ്ങളുടെ കണ്ണില്‍ പെടാതെയിരിക്കാനും തേവാങ്കിനെ സഹായിക്കുന്നു.

ഓ ടോ.
"സ്ലോത്ത്ഫുള്‍നസ്സ്‌" എന്ന സായിപ്പിന്റെ പ്രയോഗം മനസ്സിലാകണമെങ്കില്‍ പത്തു മിനുട്ട്‌ ഇവനെക്കുറിച്ച്‌ എന്തെങ്കിലും റ്റീവീ പ്രോഗ്രാം കാണുക. അങ്ങാന്‍ മടി കാരണം പട്ടിണികിടക്കാനും മടിക്കാത്തവന്‍, നിലത്തിറങ്ങാന്‍ മടി കാരണം മൂത്രമൊഴിക്കല്‍ പത്തു പതിനഞ്ചു ദിവസത്തില്‍ ഒരിക്കലാക്കിയ പഹയന്മാര്‍. എഴുതിയത്‌ ശരിയാണോ എന്ന് വിക്കി നോക്കിയപ്പോള്‍ അതിരസം - തേവാങ്കില്‍ കുഞ്ഞ്‌ തെന്നി നിലത്തു വീണാല്‍ തള്ള ചിലപ്പോള്‍ ഇറങ്ങി വന്നെടുക്കാന്‍ മടി കാട്ടുന്നതിനാലെ തറയില്‍ കിടന്ന് പട്ടിണി കോണ്ടോ ജന്തുക്കള്‍ പിടിച്ചോ സിദ്ധികൂടാറുണ്ടത്രേ (ഇതില്‍ എത്രമാത്രം സത്യമുണ്ടെന്ന് അറിയില്ല)

എക്കോക്കണ്‍ഫ്യൂഷന്‍

2006-07-02T21:29:00.000-07:00

ബാറ്റ്‌ റഡാറിനെക്കുറിച്ച്‌ ആകസ്മികമയി ഒരു "പരാമര്‍ ചാം" ഉണ്ടായിരുന്നല്ലോ, ഇത്തവണത്തെ പോസ്റ്റ്‌ ഒച്ചവച്ച്‌ തടി സംരക്ഷിക്കുന്ന ഒരു ജന്തുവിനെക്കുറിച്ചാകട്ടെ. [പലതരം ജീവികള്‍ ഒച്ചവച്ച്‌ ജീവിക്കുന്നുണ്ട്‌, ഉദാ. പിച്ചക്കാര്‍:- "അമ്മാ, സാറേ" എന്ന ഒച്ചകൊണ്ട്‌ അവര്‍ നിത്യവൃത്തി കഴിക്കുന്നു].

ബാറ്റ്‌ റഡാര്‍ ശരിക്കു പറഞ്ഞാല്‍ ഒരു റഡാര്‍ അല്ല, സോണാര്‍ ആണ്‌. റഡാര്‍ റേഡിയോ തരംഗങ്ങള്‍ അയച്ച്‌, അവ എന്തെങ്കിലും ഒരു വസ്തുവില്‍ തട്ടി തിരിച്ചു വരുന്നതിനെ ഒരു റിസീവര്‍ കൊണ്ട്‌ സ്വീകരിച്ച്‌, പഠിച്ച്‌ വസ്തുവിലേക്കുള്ള ദൂരവും മറ്റും തിരിച്ചറിയുന്നു. സോണാറും ഇങ്ങനെ തന്നെയാണു പ്രവര്‍ത്തിക്കുന്നത്‌, ചെറിയൊരു വത്യാസം മാത്രം- റേഡിയോ തരംഗങ്ങള്‍ക്കുപകരം സോണാര്‍ യന്ത്രങ്ങള്‍ ശബ്ദവീചികള്‍ അയച്ച്‌ മാറ്റൊലി സ്വീകരിക്കുന്നു എന്നു മാത്രം.

പരശ്ശതം ഇനം വാവലുകള്‍ ഈ ഭൂമുഖത്തുണ്ട്‌, അവയില്‍ ഒട്ടുി മുക്കാലും അള്‍ട്രാസോണിക്‌ തരംഗങ്ങള്‍ ആണ്‌ ഉപയോഗിക്കാറ്‌.ശബ്ദവീചികളുടെ മാറ്റൊലി പഠിച്ച്‌ ഇരയെയും വൈതരണികളേയും കണ്ടുപിടിക്കുന്ന വാവലുകളുടേയും ഡോള്‍ഫിന്‍ പോലെ ജല സസ്തനികളുടെയും മറ്റും പരിപാടിക്ക്‌ "മാറ്റൊലീ സ്ഥാനനിര്‍ണ്ണയം" echolocation എന്നാണു പറയാറ്‌. വാവലുകളുടെ എക്കോലൊക്ക്കേഷന്‍ അതിശയകരമാം വിധം കൃത്യതയുള്ളതാണ്‌. പട്ടുനൂലുകള്‍ തലങ്ങും വിലങ്ങും കെട്ടിയ ഇരുട്ടു മുറിയില്‍ പറത്തിവിട്ട വാവലുകള്‍ ഒറ്റ നൂലും പൊട്ടാതെ പറന്നു നടന്ന് മനുഷ്യന്‌ സോണാര്‍/ റഡാര്‍ രംഗത്തുള്ള യാന്ത്രിക മികവിനെ കൊച്ചാക്കി തള്ളിക്കളഞ്ഞു.

ഇത്രയും കെങ്കേമനാണു വാവലെങ്കില്‍ "എക്കോ പെര്‍ഫെക്ഷന്‍ "എന്നാണ്‌ ഈ പോസ്റ്റിനു പേരിടേണ്ടിയുന്നതെന്ന് ചിന്തിക്കുകയല്ലേ. ഈ പോസ്റ്റ്‌ വവ്വാലിനെക്കുറിച്ചല്ല. അതിലും കേമനായ ഒരുത്തനെക്കുറിച്ചാണ്‌.തൊണ്ട അള്‍ട്രാസോണിക്ക്‌ സൌണ്ട്‌ ജെനറേറ്റര്‍ ആക്കിയും ചെവി എക്കോ റിസീവര്‍ ആക്കിയും ബാറ്റ്‌ യുദ്ധവിമാനം ഹൈ ഫൈ യുദ്ധത്തിനു വരുമ്പോള്‍ പുലിപ്പൂച്ചി (tiger moth) എന്ന ചെറു ഷഡ്പദം ചിറകടിച്ച്‌ ഇവന്റെ മനുഷ്യകര്‍ണ്ണത്തിനു കേള്‍ക്കാനാവാത്ത ശബ്ദം അനുകരിച്ച്‌ തന്നെ പിടിച്ചു തിന്നാന്‍ വരുന്ന വാവലിന്റെ മാറ്റൊലിക്കണക്ക്‌ മൊത്തത്തില്‍ തെറ്റിച്ചു കളയും . "ചക്ക" എന്നു പറയുമ്പോള്‍ "ചുക്ക്‌" എന്ന് എക്കോ വരുന്നതു കണ്ട്‌ ബാറ്റേട്ടന്‍ "ഹ്യൂസ്റ്റണ്‍ വീ ഹാവ്‌ ഏ പ്രോബ്ലം." എന്നു പറഞ്ഞ്‌ മാറിപ്പോയിക്കോളും. സാക്ഷാല്‍ പുലിയായ പുലിപ്പൂച്ചിയുടെ എക്കോ കണ്‍ഫ്യൂഷന്‍ വിദ്യയുടെ പ്രാകൃതമായ അനുകരണങ്ങള്‍ യുദ്ധവിമാനങ്ങള്‍ മുതല്‍ റോഡ്‌ റഡാര്‍ ജാമര്‍ വരെയുള്ള യന്ത്രങ്ങളില്‍ മനുഷ്യര്‍ ഉപയോഗിക്കുന്നുണ്ട്‌. പുലിപ്പക്കി ഇതുവരെ ഇന്റലക്ച്യുവല്‍ പ്രോപര്‍ട്ടി റൈറ്റ്‌ സംരക്ഷിക്കാന്‍ കേസ്‌ കൊടുത്തിട്ടില്ല. ഇതു വായിച്ച്‌ ശലഭങ്ങള്‍ കേസിനിറങ്ങിയാല്‍ ഞാന്‍ ഉത്തരവാദിയുമല്ല.

ഹിലഹില

2006-07-01T21:46:00.000-07:00

തൊട്ടാവാടി sensitive plant/ touch-me-not bn- mimosa pudica) പയര്‍ കുലത്തില്‍ പെടുന്നതും നമ്മുടെ മൈലാഞ്ചിയുമായി വളരെ അടുത്ത ബന്ധമുള്ളതുമായ ഒരു മുള്‍ച്ചെടിയാണ്‌. ഒട്ടുമിക്ക ഭാഷയിലും നാണം കുണുങ്ങി (ഹിലഹില എന്നതു ഇവളുടെ ഹവായിയിലെ പേര്‍) എന്നര്‍ത്ഥംവരുന്ന പേരുള്ള ഈ ചെടി ആയുര്‍വേദവും ചൈനീസ്‌ ഹെര്‍ബല്‍ ചികിസ്ലയും ഹോമിയോപ്പതിയും തൊട്ടാവാടിച്ചെടി മരുന്നായി ഉപയോഗിച്ചുവരുന്നു. മിമോസിന്‍ എന്ന ചെറുവിഷം അടങ്ങിയിരിക്കുന്നതിനാല്‍ തൊട്ടാവാടി ചേര്‍ന്ന മരുന്നുകള്‍ സ്ഥിരോപയോഗത്തിനല്ലാതെ അടിയന്തിരഘട്ടങ്ങള്‍ തരണം ചെയ്യാന്‍ (ഉദാ. സ്ത്രീകളിലെ അമിത രക്തസ്രാവം) ആണ്‌ ഉപയോഗിക്കാറ്‌. വിഷാദരോഗത്തിന്‌ തൊട്ടാവാടി ഏറെ ഫലപ്രദമാണെന്നും പറയപ്പെടുന്നുണ്ടെങ്കിലും വിഷഭയത്താല്‍ അത്തരം പ്രയോഗങ്ങള്‍ നിലവിലില്ല.

ബ്രസീലാണ്‌ ഈ ചെടിയുടെ ജന്മദേശം എന്ന് ഒട്ടു മിക്ക പുസ്തകങ്ങളിലും (വിക്കിയിലും) കാണാം, അത്‌ ആദ്യമായി ദ്വിധനാമം നല്‍കിയത്‌ ബ്രസീലില്‍ ആണെന്ന അര്‍ത്ഥത്തില്‍ അറിയേണ്ടതാണ്‌. തൊട്ടാവാടി എതാണ്ട്‌ എല്ലാ ഉഷ്ണമേഖലാ രാജ്യങ്ങളിലും എന്നും കണ്ടുവന്നിരുന്നു. വലിയ ഉപകാരിയൊന്നുമല്ലെങ്കിലും പയര്‍ വര്‍ഗ്ഗത്തിന്റെ പൊതു കര്‍മ്മമായ നൈട്രജന്‍ ഫിക്സേഷന്‍ നടത്തി ലജ്‌വന്തിയും തന്നാലാവും വിധം മണ്ണിനെ സഹായിക്കുന്നു.
വിദ്യ:
തൊട്ടാല്‍ ക്ഷണം വാടുന്ന വിദ്യ ഇവള്‍ എങ്ങനെ കാട്ടുന്നെന്ന് ഇപ്പോഴും കൃത്യമായി അറിവില്ല. ഇലകളുടേ ചുവട്ടിലെ പള്‍വിനസ്‌ കോശങ്ങള്‍ക്ക്‌ ടര്‍ഗര്‍ പ്രഷര്‍ (ദ്രാവകങ്ങള്‍ ഭിത്തിയില്‍ ചെലുത്തുന്ന സമ്മര്‍ദ്ദം) കൂട്ടിയും കുറച്ചും ഇലകളെ കൂമ്പാനും വീണ്ടും അമ്പാനും ഉള്ള കഴിവുണ്ടെന്നും. ചെടി എന്തെങ്കിലും സ്പര്‍ശിച്ചാല്‍ ആക്റ്റിന്‍ എന്ന പ്രോട്ടീന്‍ ഉല്‍പ്പാദിപ്പിച്ച്‌ ഈ പ്രക്രിയ ട്രിഗര്‍ ചെയ്യുന്നെന്നുമാണ്‌ ഇന്നുള്ളതില്‍ ഏറ്റവും വിശ്വസനീയമായ വാദം.
നുണുക്കുവിദ്യ:
വവ്വാലുകള്‍ വീടിന്റെ ഉത്തരത്തിലും കഴുക്കോലിലും ലാമ്പ്‌ ഷേഡിലും രാത്രി വന്നു തൂങ്ങി വീടു വൃത്തികേടാക്കുന്നുണ്ടോ? തൊട്ടാവാടി മൂടോടെ വെട്ടി ഉണക്കി
അവറ്റ വന്നു തൂങ്ങുന്ന സ്ഥാനത്ത്‌ കെട്ടിത്തൂക്കുക. ഇരുട്ടുവാക്കിന്‌ വാവലേട്ടന്‍ വന്ന് ലജ്ജാവതിയെ ആഷ്ലേഷിച്ച്‌ മുള്ളുകൊണ്ട്‌ കുടത്തുണിയും കീറി പമ്പകടക്കും. ശിഷ്ടകാലം ആ യേരിയ കണ്ടാല്‍ വാവല്‍ മൂത്രമൊഴിക്കും! ഒരു പട്ടുനൂലു കെട്ടിയാല്‍ അതു പൊട്ടാതെ പറക്കാന്‍ മാത്രം കിറു കൃത്യതയുള്ള റഡാര്‍ കൈവശമുള്ള വാവലിനെ ഈ ചെടി മൂക്കുകൊണ്ട്‌ ക്ഷാ റാ വരപ്പിക്കുന്നത്‌ എന്നെ അതിശയിപ്പിച്ചിട്ടുണ്ട്‌.